Ռոբերտ Նազարյանը վիրավորվեց
Ինչո՞ւ Հանրային ծառայությունները կարգավորող պետական հանձնաժողովն ամբողջությամբ չի կատարում «Էներգետիկայի մասին» ՀՀ օրենքի պահանջները. ՀՅԴ խմբակցության ղեկավար Վահան Հովհաննիսյանի այս հարցն այսօր այդպես էլ պատասխան չստացավ: Հստակ պատասխան չունենալով հանդերձ` հանձնաժողովի նախագահ Ռոբերտ Նազարյանը դեմ է, որ ԱԺ-ում ստեղծվի գազամատակարարման համակարգի գործունեության ուսումնասիրող ժամանակավոր հանձնաժողով:
Հանձնաժողովի ստեղծմանը դեմ է նաեւ Էներգետիկայի նախարար Արմեն Մովսիսյանը: «Ի՞նչ կարիք կա հանձնաժողով ստեղծելու, եթե ամեն ինչ պարզ է եւ թափանցիկ: Հանձնաժողովը պետք է միսիան իրականացնի, գործառույթ ունենա, իսկ այս պարագայում անելու բան չունի»,- ասաց նախարարը:
ՀՅԴ խմբակցությունը համարում է, որ «Հայռուսգազարդը» խախտում է «Էներգետիկայի մասին» ՀՀ օրենքը նաեւ այն պատճառով, որ մենաշնորհային դիրք ունի: Այս հարցում Արմեն Մովսեսյանը նույնպես համամիտ չէ ՀՅԴ-ի հետ. «Սակագինը որոշում է ոչ թե «Հայռուսգազարդը», այլ հանձնաժողովը, դա արդեն «Հակամենաշնորհային օրենքի» դրույթ է»: Նախարարն այսօր նաեւ վստահեցրեց, որ մինչեւ 2012թ. ապրիլի 1-ը ՀՀ-ում գազի սակագինը չի փոխվի:
ՀՅԴ-ն վստահ չէ, ոչ միայն սակագնի կայունության հարցում, այլեւ մի շարք այլ մտահոգություններ ունի` սկսած ինչ գնով են «Հայռուսգազարդը» գազ ստանում Ռուսաստանից եւ այն մինչեւ սպառողին հասնելն ինչ է դառնում: «Մենք այսօր ունենք եվրոպական չափանիշներն համապատասխան օրենք եւ ռեալ կյանք, որը չի համապատասխանում միմյանց: Օրինակ` ինչո՞ւ չի կարելի, որը գազը տարվա եղանակի հետ կապված դիֆերենցված գին ունենա: Տարբեր գներ ունենա օրվա տարբեր ժամերին, ինչպես դա կա էլեկտրաէներգիայի դեպքում: Այս հարցերին հանձնաժողովը չի անդրադարձել»,- այսօր քննարկումներից հետո «Ա1+»-ին ասաց պարոն Հովհաննիսյանը:
«Գոյություն ունի նաեւ «Տրանսգազ» ընկերություն, որը մեր տները գազ հասցնող ընկերությունն է: Նման ընկերություններ կան այն երկրներում, որոնք տարանցիկ են գազի համար: Հայաստանը փակուղի է գազի համար, այլ երկիր չի տեղափոխվում: Այստեղ «տրանս» ածանց ունեցող ընկերության նշանակությունը ո՞րն է»,- շարունակեց պարոն Հովհաննիսյանը:
ՀՅԴ-ին մտահոգող հարցերի մեծ մասին այսօր պատասխանեց Հանրային ծառայությունները կարգավորող պետական հանձնաժողովի նախագահ Ռոբերտ Նազարյանը, որին վիրավորեցին այն մեղադրանքները, թե իր գլխավորած հանձնաժողովը չի պաշտպանում սպառողների շահերը:
Նա ընդգծեց, որ ցանկացած սպառող պետք է փոխհատուցի իրեն մատուցվող ծառայությունների համար նախատեսված ծախսերը: Նշելով, որ փոքր սպառողները, այդ թվում եւ բնակչությունը հանդիսանում են գազամատակարարման վերջին օղակի սպառողները եւ նրանց գազամատակարարումը պահանջում է ավելի մեծ ծախսեր եւ ներդրումներ՝ պարոն Նազարյանն ասաց. «Թեեւ բնակչությունը սպառում է մատակարարված գազի ընդամենը 30 տոկոսը, սակայն նրան բաժին է ընկնում համակարգի ամբողջ ծախսերի շուրջ 60 տոկոսը եւ ներդրումների գերակշիռ մասը»:
Հիշեցնենք, որ Հայաստան գազը ներկրվում է 180 ԱՄՆ դոլարով, սակայն քաղաքացիներին վճարվում է 341 դոլարով: Ներկայումս ՀՀ-ում կա 600 հազար գազ սպառող:
ՀՅԴ-ի նախաձեռնությամբ այսօր ԱԺ-ում կազմակերպված լսումների արդյունքում այդպես էլ չպարզվեց՝` կստեղծվի՞ ազամատակարարման համակարգի գործունեության ուսումնասիրող ժամանակավոր հանձնաժողով, թե՞ ոչ:
