Ապահովագրավճարները նվազեցվում են
«Եկամտահարկի մասին» ՀՀ օրենքում լրացում կատարելու մասին» ՀՀ օրենքով (ուժի մեջ է մտել 2010թ. ապրիլի 23-ին) սահմանվում է, որ հարկվող եկամուտը որոշելիս վարձու աշխատողների համախառն եկամտից նվազեցվում են գործատուների կողմից իրենց առողջության ապահովագրության համար կատարված ապահովագրավճարները:
Այս մասին այսօր հայտարարել է ՀՀ ֆինանսների նախարարության աշխատակազմի պետական եկամուտների քաղաքականության և վարչարարության մեթոդաբանության վարչության պետ Վախթանգ Միրումյանը' անդրադառնալով «Եկամտահարկի մասին» ՀՀ օրենքում կատարված փոփոխությանը, որն ուղղված գործատուների կողմից իրենց վարձու աշխատողների առողջության ապահովագրության համար կատարված ապահովագրավճարների նվազեցմանը:
Յուրաքանչյուր վարձու աշխատողի համար ապահովագրավճարները նվազեցվում են եկամտի ստացման յուրաքանչյուր ամսվա հաշվով մինչեւ տասը հազար դրամի չափով:
Նախքան վերոնշյալ օրենսդրական փոփոխության իրականացումը' գործատուների կողմից իրենց վարձու աշխատողների առողջության ապահովագրության համար կատարվող ապահովագրավճարների գումարները վարձու աշխատողների համար համարվում էին հարկվող եկամուտներ, իսկ գործատուները պարտավոր էին այդ եկամուտների մասով հանդես գալ որպես հարկային գործակալ, այսինքն' հաշվարկել, պահել եւ պետական բյուջե վճարել եկամտահարկի համապատասխան գումարները: Նախկինում գործող օրենսդրությունը, ըստ Վախթանգ Միրումյանի' չէր նպաստում, որպեսզի գործատուները ապահովագրավճարներ կատարեին իրենց աշխատակիցների առողջության պահպանության նպատակով:
Կատարված օրենսդրական փոփոխություններով սահմանվել է, որ եկամտի ստացման յուրաքանչյուր ամսվա հաշվով մինչեւ տասը հազար դրամի չափով գործատուների կողմից իրենց վարձու աշխատողների առողջության ապահովագրության համար կատարված ապահովագրավճարները եկամտահարկով հարկման նպատակով համարվում են նվազեցվող եկամուտներ (հարկման ոչ ենթակա եկամուտներ), ինչը նաեւ նշանակում է, որ գործատուներն ազատվում են այդ չափի սահմաններում վարձու աշխատողների օգտին կատարված ապահովագրավճարներից եկամտահարկը հաշվարկելու, պահելու եւ պետական բյուջե վճարելու պարտավորությունից:
