Կառավարությունը քննարկման է ներկայացրել դպրոցների տնօրենների ընտրության և նշանակման գործընթացի նոր փոփոխություններ, որոնք նպատակ ունեն լուծել նոր ձևաչափով իրականացվող հարցազրույցի և զարգացման ծրագրերի գնահատման խնդիրները։

Նախագիծը հրապարակվել է e-draft.am իրավական ակտերի հրապարակման կայքում։ Այս փոփոխությունները հիմնականում վերաբերում են զարգացման ծրագրերի գնահատման, թեկնածուների մասնագիտական ունակությունների ստուգման և փորձաշրջանի կազմակերպման ոլորտներին։ 

Տնօրենների ընտրության և նշանակման նոր ձևաչափով գործընթացի մեկնարկից հետո, ի հայտ են եկել մի շարք խնդիրներ, որոնց լուծման համար անհրաժեշտ են որոշակի կարգավորումներ։ Նախագծով առաջարկվում է վերանայել զարգացման ծրագրի գնահատման կարգը՝ այն բաժանելով «բովանդակություն» և «ինքնուրույն աշխատանք» բաղադրիչների: Այս փոփոխությունը հնարավորություն կտա ավելի օբյեկտիվ գնահատել, թե արդյոք թեկնածուները կարողանում են ինքնուրույն ներկայացնել իրենց ծրագրերը։

Համաձայն նախագծի՝ թեկնածուների հարցազրույցի փուլը երկու անգամ չհաղթահարած անձանց համար սահմանվում է զարգացման նոր ծրագիր ներկայացնելու պահանջ։ Իսկ այն թեկնածուները, որոնք կունենան մասնագիտական հանձնաժողովի ամբողջական դրական եզրակացություն, կդառնան տնօրեններ առանց փորձաշրջանի։ Եթե թեկնածուն ունի մեկ բացասական եզրակացություն, նա կնշանակվի փորձաշրջանով, որի ընթացքում կստանա մենթորի աջակցություն։ 

Սույն փոփոխությունները միտված են կրթության ոլորտում բարեփոխումների գործընթացի ուժեղացմանը։ Մենթոր դպրոցների ներգրավմամբ կապահովվի տնօրենների մասնագիտական աջակցության անհրաժեշտ մակարդակը՝ խթանելով դպրոցների ուսումնական որակի բարձրացումը և կառավարման հմտությունների զարգացումը։