Ռուբեն Հայրապետյանը պատրաստ է պառկել
Հայաստանի ֆուտբոլի երկրպագուներին ակցիայից առաջ այցելել էր պատգամավոր, ՀՖՖ նախագահ Ռուբեն Հայրապետյանը, որը ողջունեց երիտասարդների՝ «Հրազդան» մարզադաշտի տարածքում առեւտրի կենտրոն կառուցելուն դեմ պայքարի նախաձեռնությունը' նշելով, որ ազգային արժեքները պետք է մնան ազգին:
Այնուհետեւ ՀՖՖ նախագահը պատասխանեց «Ա1+»-ի եւ «Ազատություն» ռադիոկայանի հարցերին:
-Պարոն Հայրապետյան, ի՞նչ դիրքորոշում ունեք խնդրի նկատմամբ եւ ինչպիսի՞ն են լինելու ձեր հետագա քայլերը:
- Ես կարծում եմ, որ «Հրազդան» մարզադաշտի տարածքում չի կառուցվելու որեւէ բան: Ես ամեն ինչ կանեմ, մինչեւ անգամ կպառկեմ էքսկավատորի տակ: Ոչ մեկը Հրազդանը մեր ձեր ձեռքից չի առնելու։
-Բայց այնտեղ սեփականության խնդիր կա, չէ՞:
-Գիտե՞ք ինչ, այդ սեփականությունը ինձ քիչ է անհանգստացնում: Կարեւորը նպատակին ծառայի, հո ակներ չեն դնելու Հրազդան մարզադաշտը տանեն այլ երկիր:
-Իսկ նման դիրքորոշումը ցույց չի՞ տալիս արդյոք, որ դուք ակնհայտ դեմ եք դուրս գալիս «Հրազդան» մարզադաշտի վարձակալի՝ ՀՀԿ-ական Աշոտ Աղաբաբյանի ծրագրերին, չե՞ք վախենում, որ ձեր կուսակցական ընկերները դա ճիշտ չեն ընկալի:
- Երբ ես ծնվել եմ՝ առաջինը, որ իմ ծնողներն արել են, իմ վախը հանել են։ Ես ընդհանրապես չեմ վախենում: Այո, Աշոտ Աղաբաբյանը իմ կուսակցական ընկերն է, ԱԺ-ում մենք միասին գործընկերներ ենք, ես չեմ կարծում, որ նա այս երկրի մասին չի մտածում, ուղղակի պետք է ավելի ճիշտ մատուցել իրեն: Ես չեմ կարծում, որ կլինի մարդ, որը կուզենա սերունդների առաջ դատապարտվել:
-Մամուլում գրվել է, որ ձեր եւ Աշոտ Աղաբաբյանի միջեւ անձնական խնդիրներ կան:
-Իմ եւ Աղաբաբյանի միջեւ ոչ մի հակասություն չկա։ Այո, ես որ պասիվ էի այս ժամանակահատվածում, նաեւ այն էր, որ անձնավորել էին, թե իբր ես մարզադաշտը ուզում եմ խլել: Ժողովուրդ, ես հայտարարում եմ՝ «Հանրապետական» մարզադաշտը տալիս եմ իրեն նվեր, «Հրազդան» մարզադաշտը նույնպես թող մնա իրեն, բայց որեւէ կառույց չկառուցվի, եւ մենք ուղղակի այն օգտագործենք ֆուտբոլի համար: Ես ինքս ցանկություն չունեմ մարզադաշտ ունենալու: Բոլոր սպորտային կառույցները դա ժողովրդինն են:
-Պարոն Աղաբաբյանն ասում է, որ Թուրքիայի հետ հանդիպմանը ոչ մի խնդիր էլ չի առաջացել:
-Այո ճիշտ է ասում, որովհետեւ այդ ժամանակ 18 000 հանդիսական է եղել, իսկ եթե 56 000 եղավ, ի՞նչ ենք անելու:
-Բայց մինչեւ շինարարություն սկսելն այնտեղ անվտանգ է:
- Հենց այս պահին միջազգային որեւէ խաղ առանց որեւէ կառույցի չեն կարող անցկացնել: Ամենակարեւոր խնդիրը, որ գոյություն ունի դա տարհանման խնդիրն է, որ մարդկանց անվտանգության հետ է կապված, երկրորդը խոտածածկի անորակությունը, լույսերի բացակայությունը, պետք է լինի 1800 լույս, այնինչ 300 հատ կա; Էդ լույսերի ու խոտի հարցը կարելի է լուծել 1-2 ամսում, բարդը տարահանման պրոբլեմն է;
-Իսկ դուք պատրա՞ստ եք մարզադաշտը բերել միջազգային չափանիշների եւ այնտեղ կրկին հանդիպումներ անցկացնել:
- Իհարկե, մենք ներդրումների պատրաստ ենք, «Հրազդան» մարզադաշտը դա անհրաժեշտություն է:
-Իսկ Աշոտ Աղաբաբյանի հետ քննարկե՞լ եք այս խնդիրը:
-Առայժմ, ոչ, մենք այդ հարցով իրար հետ որեւէ քննարկում չենք ունեցել:
