Անվերադարձ միլիոններ՝ ՀՀ տնտեսությանը
Համաշխարհային բանկի խմբի անդամ հանդիսացող Միջազգային Ֆինանսական կորպորացիան /IFC/ Հայաստանին աջակցելու է տնտեսական բարեփոխումներ իրականացնելու նպատակով:
Այսօր համաձայնագիր են ստորագրել ՀՀ Էկոնոմիկայի նախարար Տիգրան Դավթյանն և Միջազգային ֆինանսական կորպորացիայի ներկայացուցիչ Թոմաս Լյուբեքը:
Համաձայնագիրը ստորագրելուց հետո ՀՀ Էկոնոմիկայի նախարար Տիգրան Դավթյանը հայտարարեց, որ փաստաթղթով նախատեսված է Հայաստանում իրականացնել հարկային վարչարարության բարեփոխումներ, արտահանման և ներմուծման գործընթացների աջակցություն, ինչպես նաև տնտեսվարող սուբյեկտների ստուգումներ և ապահովել սննդի անվտանգություն:
«IFC-ն պատրաստ է այսուհետ համագործակցել Հայաստանի կառավարության հետ՝ առևտրային ոլորտում: Համաձայնագրի շրջանակներում կիրականացվի ներդրումային միջավայրի բարեփոխումների ծրագիր»,- տեղեկացրեց նախարարը։
Միջազգային ֆինանսական կորպորացիայի Կովկասյան տարածաշրջանի բաժնի ղեկավար Թոմաս Լյուբեքն էլ ներկաներին բացատրեց. «Փոքր ձեռնարկատերեն ու բիզնեսներն են, որոնք երաշխավորում են երկրի տնտեսության աճը և զարգացումը»:
Պարոն Լյուբեքը տեղեկացրեց, որ IFC-ը շարունակում է Հայաստանում ներդրումներ անել նաև այլ ուղղություններով, որոնց գումարային չափը հասել է 40 մլն դոլարի՝ հաշվետու ժամանակահատվածում:
Էկոնոմիկայի նախարար Տիգրան Դավթյանն էլ նշեց. «ֆինանսական տեսակետից գրանտ է և անվերադարձ։ Նպատակը տեխնիկական աջակցությունն է»:
