«Արմավիան» եւ «Զվարթնոցը» վերջապես հաշտվեցին
Տարօրինակ պատմություն է ստեղծվել «Արմենիա միջազգային օդանավակայաններ» ընկերության եւ «Արմավիա» ավիաընկերության միջեւ։
«Արմավիա»-ն այսօր որոշել էր դադարեցնել մեկնարկած բանակցությունները։ Այդ առիթով էլ «Զվարթնոց»-ը ասուլիս էր հրավիրվել օդանավակայանում, սակայն ասուլիսից րոպեներ առաջ հայտարարվեց, որ նրանց միջեւ նոր համաձայնագիր էր ստորագրվել։
«Արմենիա միջազգային օդանավակայաններ» ընկերության մամուլի քարտուղար Գեւորգ Աբրահամյանը «Ա1+»-ին հայտնեց, որ համաձայն ստորագրված պայմանագրի՝ պարտքերի մարման գրաֆիկ է կազմվել։
Մարտի 31-ից «Արմավիան» մաս-մաս պետք է մարի 5 մլն 300 հազար ԱՄՆ դոլարի չափով պարտքը։ Համաձայնության են եկել նաեւ նոր սակագների շուրջ։
Հիշեցնենք, որ այսօր «Արմենիա միջազգային օդանավակայաններ»-ը հայտարարել էր, որ «Արմավիան» դադարեցրել է բանակցությունները։
