Բժշկականում իմպլանտոլոգի մասնագիտություն չկա
Հայաստանում կա իմպլանտոլոգների պակաս։ Ըստ Երեանի պետական բժշկական համալսարանի վիրաբուժական ստոմատոլոգիայի ամբիոնի պրոֆեսոր Գագիկ Հակոբյանի, սա է այսօր ոլորտի հիմնական խնդիրը։
«Այսօր դեռևս իմպլանտոլոգի մասնագիտություն Բժշկական համալասարանում չկա,- ասաց նա,- և որակյալ իմպլանտոլոգներ Հայաստանում շատ քիչ են»։
«Ա1+»-ի հետ զրույցում նա վստահեցրեց, որ Հայաստանում իմպլանտոլոգիական նյութերն և տեխնոլոգիաները որակով չեն զիջում եվրոպականին, քանի որ դրանք ներկրվում են։
Իմպլանտ մեկ ատամի գինը Հայաստանում տատանվում է 300-500 դոլարի սահմանում։ Պարոն Հակոբյանը պնդում է , որ սա այնքան բարձր գին չէ՝ Եվրոպայի համեմատ։ Եվրոպայում միջինը 1500-2500 եվրոյի սահմաններում է իմպլանտ տեղադրվում։
Հայ իմպլանտոլոգներն այսօր իրենց առաջին գիտաժողովն անցկացրին Երեւանում։ Հայաստանի իմպլանտոլոգների ասոցացիան ստեղծվել է 2011-ին։
Իմպլանտոլոգների ասոցացիայի նախագահ Կարեն Գրիգորյանն խոսեց ոչ միայն բժշկի շահերից։ Ըստ նրա՝ Հայաստանում կա նաեւ պացիենտների շահերը պաշտպանելու խնդիր, որպեսզի նրանք, ոլորտի մասնագետների պակասի պարագայում, կարողանան ստանալ որակյալ բուժում։
Իսկ , ըստ պրոֆեսոր Գագիկ Հակոբյանի, ասոցացիան պետք է կատարի մաղի դեր, որն «իր միջով բաց կթողնի միայն որակյալ մասնագետների»։
Ասոցացիան համագործակցում է Ռուսաստանի և Եվրոպայի իմպլանտոգների կազմակերպությունների հետ։ Այսօրվա գիտաժողովին մասնագիտական ելույթներով հանդես եկան ինչպես հայ, այնպես էլ Ռուսաստանից ժամանած բարձրակարգ մասնագետներ։
