Սկեսուրին կդատեն դռնփակ
Ամուսնու եւ սկեսրոջ կողմից դաժանաբար ծեծի ենթարկված Մարիամ Գեւորգյանի գործով դատական նիստը կանցկացվի դռնփակ։
Արարատի եւ Վայոց ձորի մարզերի ընդհանուր իրավասության դատարանի դատավոր Արմեն Բեկթաշյանը բավարարել է այս գործով անցնող մյուս տուժողի՝ Մելինե Բայաթյանի եւ ամբաստանյալ Հայկանուշ Միքայելյանի պաշտպանների միջնորդությունը՝ դատական նիստը դռնփակ անցկացնելու վերաբերյալ։
Մարիամ Գեւորգյանի ներկայացուցիչ Նոնա Գալստյանն այսօր «Ա1+»-ին հայտնեց, որ միջնորդության բավարարումից հետո, ինքնաբացարկի միջնորդություն է ներկայացրել դատավորին, իսկ միջնորդությունը հիմնավորելու համար երկու օր ժամանակ է խնդրել։
Դատական նիստը կշարունակվի հունիսի 1-ին։
Հիշեցնենք, որ ամուսնու` Դավիթ Զիրոյանի ու սկեսրոջ` Հայկանուշ Միքայելյանի կողմից դաժանաբար ծեծված և տարբեր խոշտանգումների ենթարկված 20-ամյա Մարիամ Գևորգյանը ամուսնանալուց մոտ 10 ամիս անց վերադարձել է Հայաստան Ռուսաստանից։
Գործով անցնող մյուս տուժողը՝ Մելինե Բայաթյանը, Մարիամ Գեւորգյանի ամուսնու առաջին կինն է եղել։
