Դոմինգոն՝ Խաղաղության արտիստ
Իսպանացի աշխարհահռչակ տենոր՝ Պլասիդո Դոմինգոյին շնորհվել է UNESCO -ի Խաղաղության արտիստի կոչում
Այս մասին իսպանական հեռուստաընկերություններից մեկին հայտնել է անձամբ երգիչը՝ Լիսաբոնում երեկ երեկոյան անցկացված Europa Nostra մրցանակաբաշխության ժամանակ, որտեղ Դոմինգոն ժյուրիի նախագահն էր։
Ինչպես պատմել է երգիչը UNESCO-ի որոշումը, որը «մեծ պատիվ է իր համար»,միանգամայն անակնկալ է եղել։
«Հիմա պետք է հանդիպեմ կազմակերպության ղեկավարների հետ և կքննարկենք, տեսնենք, թե իմ աշխատանքները ինչ ուղղվածությամբ պետք է ընթանան և որտեղ կարող եմ առավել օգտակար լինել», ասել է Իսպանացի երգիչը։
Այս կոչումը տրվում է հանրային և համաշխարհային խնդիրներում խաղաղության ներդրում ունեցող անհատներին, օժտելով նրանց՝ արդարության, հանդուրժողականության, երեխաների հանդեպ ուշադրության, անգրագիտության դեմ պայքարի և միջավայրի պաշտպանության խնդիրները հանրությանը իրազեկելու և նրանց ուշադրությունը այդ խնդիրներին բևեռելու առաքելությամբ։
Ըստ ИТАР-ТАСС-ի՝ այդ կոչումին արժանացել են բրազիլացի երգիչ Ժիլբերտու Ժիլը, ճապոնացի երաժիշտ Էյդզին Նիմուրան, պորտուգալացի արտիստուհի և ռեժիսոր Մարիա դը Մադեյրոսը, ռուս դիրիժոր Վլադիմիր Սպիվակովը, հայտնի երգչուհի Ալսուն և այլոք։
