Տիգրան Սարգսյանը հիվանդանոցում էր
Վարչապետ Տիգրան Սարգսյանն այսօր այցելել է հիվանդանոց՝ տեսնելու Սոս Սարգսյանին։ Այսօր մեծանուն դերասանի ծննդյան օրն է:
«Ուզում եմ տեղեկացնել, որ այսօր այցելել եմ հիվանդանոց՝ մեծանուն դերասանին: Ուրախությամբ ասեմ, որ նա ուներ բավականին բարձր տրամադրություն: Բժիշկներն ինձ տեղեկացրեցին, որ վարպետի առողջական վիճակն այսօր ավելի լավ է...
Ծնունդդ շնորհավոր, սիրելի վարպետ»,- իր բլոգում գրել է Հայաստանի վարչապետ Տիգրան Սարգսյանը։
ՀՀ Վարչապետի շնորհավորական ուղերձը ՀՀ Ժողովրդական արտիստ Սոս Սարգսյանի ծննդյան 83-ամյակի կապակցությամբ
Հարգելի Սոս Արտաշեսի, սիրելի Վարպետ.
Սրտանց շնորհավորում եմ Ձեր ծննդյան 83-րդ տարեդարձը: Ասում են, որ մարդուն չափում են ոչ թե իր ապրած տարիներով, այլ դրանց իմաստալիությամբ: Սիրելի Վարպետ, Ձեր ապրած յուրաքանչյուր տարի մի լուսավոր կետ է մեր ժողովրդի պատմության մեջ` լի խորությամբ և իմաստությամբ: Ցանկանում եմ խուսափել ընդունված պաշտոնական հաղորդագրության ձևերից և իմ շնորհակալությունը հայտնել Ձեզ այն խոր հետքի, որ թողել եք Դուք իմ և իմ սերնդակիցների վրա: Իմ երիտասարդության տարիներին աշխատում էի բաց չթողնել մի որևիցե ներկայացում, որտեղ խաղում էիք Դուք, սիրելի Վարպետ: Պրեմիերայից դեռ 10-15 օր առաջ իմանում էինք, որ այսօր, մեր սիրելի Սոսն է խաղալու, անմիջապես փորձում էինք տոմսեր գտնել` հերթական ներկայացումը բաց չթողնելու համար: Ես ցանկանում եմ շնորհավորել նաև Սոս Սարգսյան մտավորականի, Հայաստանի քաղաքացու տարեդարձը: Պետական-քաղաքական բազմաթիվ գործիչներ զգաստացել են Ձեր արդար խրատներից, սխալը տեսնելու և դրա մասին անմիջապես բարձրաձայնելու ըմբոստ և անհանգիստ մտավորականի կեցվածքից:
Սիրելի Վարպետ, ցանկանում եմ Ձեզ քաջ առողջություն, ընտանեկան ջերմություն և ստեղծագործական եռանդ:
