Թռչնաֆաբրիկաներում հավերը չե՞ն սատկել
Թռչնաֆաբրիկաներում թվաքանակի ոչ մի անկում եւ հիվանդություն չկա. այսօր այս մասին հայտնեց սննդամթերք արտադրող ընկերությունների հետ քննարկմանը ներկա ՀՀ սննդի անվտանգության պետական ծառայության պետ Աբրահամ Բախչագուլյանը:
«Անկումներ թռչնաֆաբրիկաներում այս օրվա դրությամբ չկա, որովհետեւ մենք այդ լուրը ստանալուց հետո, ամենօրյա հսկողություն ենք իրականացնում բոլոր ֆաբրիկաներում, ոչ մի հիվանդություն չկա»,-հավելում է նա:
Նա նշեց, որ երեկ ահազանգ ստանալուց հետո, սննդի անվտանգության պետական ծառայության աշխատակիցները այցելել են թռչնաբուծական բոլոր ֆաբրիկաները:
«Իրականացրել են ուսումնասիրություն, այնտեղ առկա թռչնի գլխաքանակի հետ կապված խախտումներ չկան, եւ այդ լուրը չի համապատասխանում»,-ասում է Բախչագուլյանը։
Հիշեցնենք, որ երեկ «Հետքը» գրել էր,թե իր աղբյուրներն ահազանգում են, որ Հայաստանի մի քանի թռչնաֆաբրիկաներում տարածված է բրոնխային ինֆեկցիա հիվանդությունը, որի արդյունքում մեծ քանակով հավեր են սատկել: Որոշ սեփականատերեր շտապում են արագացնել հիվանդ թռչունների մորթը մինչեւ դրանց սատկելը:
