Դիզվառելիքը բաշխել են ծանոթ-բարեկամի
Խախտումներ են հայտնաբերվել Արարատի, Կոտայքի, Գեղարքունիքի, Շիրակի մարզերում՝ կապված պետական աջակցությամբ մատչելի գներով դիզելային վառելանյութի և ազոտական պարարտանյութի բաշխման գործընթացի հետ։
Խախտումներ ու չարաշահումներ են կատարվել դիզելային վառելիքի և պարարտանյութերի բաշխման գործում։
Այս մասին այսօր լրագրողների հետ հանդիպմանը հայտարարեց Ֆինանսների նախարարության վերահսկողական տեսչության պետ Սոնա Ղարիբյանը։
«Առավել շատ խախտումներ մեր տեսչությունը հայտնաբերել է Արարատի մարզում: Բացահայտված դեպքերը արտառոց են, մենք ստուգել ենք 20-27 համայնք»,-նշեց տիկին Ղարիբյանը։ Ըստ նրա, ցուցակներում գրանցված են եղել այնպիսի մարդիկ, ում անհրաժեշտ չի եղել դիզվառելիք կամ պարարտանյութ։ Յուրաքանչյուր մարզում պետությանը հասցվել է 83 մլն դրամի վնաս։
Արդյո՞ք համապատասխանում են իրականությանն այն լուրերը, որ Մխչյան գյուղում ԱԺ նախագահ Հովիկ Աբրահամյանը, իր եղբայրն ու բարեկամներն օգտվել են դիզվառելիքից։
«70 հազար լիտրից ավել դիզվառելիք բաժանվել է 15 անձի։ Իսկ պարարտանյութի մասով չեմ հիշում, բայց թիվը փոքր էր։ Ցուցակում գրված չի եղել Հովիկ Աբրահամյան, եղել է՝ Հովհաննես Աբրահամյան, Հենրիկ Աբրահամյան։ 35 հազար լիտր դիզվառելիք գրանցված է եղել Հովհաննես Աբրահամյանի մասով»,-ասաց նա։
Տիկին Ղարիբյանը տեղեկացրեց նաև, որ ստուգումների արդյունքները կամփոփվեն այս շաբաթվա վերջ և հայտնաբերված խախտումների փաթեթը կուղարկեն Հատուկ Քննչական Ծառայություն։
