Ծեծել են «Բարեւ» շարժման ակտիվիստին
Երեկ`սեպտեմբերի 18-ին, Լենինգրադյանի փողոցի վերջնամասում գտնվող Շիրակ հանրախանութի մոտակայքում ծեծի է ենթարկվել «Բարև» շարժման ակտիվիստ, «Ժողովրդավարական ուղի» կուսակցության անդամ Վիգեն Դավթյանը։
Վերջինս բաժանելիս է եղել «Ժառանգություն» կուսակցության առաջնորդ Րաֆֆի Հովհաննիսյանի սեպտեմբերի 20-ի հանրահավաքը իրազեկող թռուցիկները:
«Երբ Վիգենը փորձել է մոտենալ բարձրահարկ շենքի բակում նստած ծերունիներին, նրան են մոտեցել մի խումբ երիտասարդներ ու փորձել խոչընդոտել: Վիգենը հղում է արել գործող կարգը և նշել, որ նա իրավունք ունի թռուցիկներ բաժանել, բայց տղաները ասել են, թե մենք ի՞նչ օրենքով երկրում ենք ապրում, որ օրենք ես մեջբերում, ու սկսել են հարվածել Վիգենին»,-«Ա1+»-ի հետ զրույցում պատմեց «Բարև, Երևան» դաշինքից ավագանու անդամ, ԺՈՒԿ անդամ Արթուր Գասպարյանը:
Պարոն Գասպարյանը տեղեկացրեց, որ այդտեղ հավաքված ծերունիները չեն միջամտել, և միայն ինչ-որ երիտասարդ է մոտեցել ու փորձել կանխել վեճը:
«Երիտասարդը խնդրել է Վիգենին ընթացք չտալ դեպքին, բայց Վիգենը զանգել է ոստիկանություն: Նրան առաջին բուժօգնություն են ցույց տվել: Վիգենը ստացել է մի շարք վնասվածքներ դեմքի ու ողնաշարի հատվածում»,- նշեց Արթուր Գասպարյանը:
Պարոն Գասպարյանը դեռ տեղյակ չէ բերման ենթարկվե՞լ են Վիգեն Դավթյանին ծեծի ենթարկած երիտասարդները, թե ոչ, քանի որ նրանք դեպքի վայրից դիմել են փախուստի:
Արթուր Գասպարյանը հույս ունի, որ դեպքը կբացահայտվի, ու վերջապես վերջ կդրվի նմանատիպ վայրագություններին:
