Մետրոն չի աշխատում
Երեւանի Մետրոպոլիտենի կայանները չեն սպասարկում ուղեւորներին։ Թեեւ Երեւանի որոշ վարչական շրջաններում հոսանքը վերականգնվել է, սակայն Մետրոպոլիտենի աշխատանքը չի վերականգնվել։ Շատ ուղեւորներ կանգնած են Մետրոպոլիտենի Հանրապետության հրապարակի կայանի դռների մոտ եւ անհամբեր սպասում են, թե երբ են վագոններն աշխատելու։
Մետրոպոլիտենի ոստիկանը նրանց խորհուրդ տվեց հեռանալ՝ նշելով, որ այս վիճակը դեռ 1-2 ժամ կշարունակվի։
Իսկ Մետրոպոլիտենի աշխատակիցն էլ նշեց, որ իրենց մեղքն այս ամենում շատ քիչ է, ընդհանուր հոսանքն է անջատվել։ «Այնքան վատ է վիճակը, որ վագոնները թունելներում կանգնած են, իսկ մարդկանց տարհանել են»,- նշեց նա։
Ի դեպ, հոսանքի անջատվելուց հետո պոմպերը սկսել են չաշխատել, եւ այս պահին մետրոպոլիտենի աշխատակիցները փորձում են հեռացնել թունելներում լցված ջուրը։
