Աձնագրայիններում կուտակումներ են սկսվել (տեսանյութ)
Տոներից հետո անձնագրային բաժանմունքներում կուտակումներ են։ Հրմշտոցն ու վիճաբանությունը այսօր անպակաս էին նաև Շենգավիթի անձնագրային բաժանմունքում։ Քաղաքացիները գալիս են ժամկետն անց անձնագրերը փոխելու նպատակով: Կառավարության որոշմամբ` 2014 թվականից անձնագրի ժամկետը լրացած քաղաքացիներին կտրամադրվի նոր` կենսաչափական անձնագիր կամ նույնականացման քարտ: «Արդեն 4-րդ օրն է՝ գալիս-գնում եմ: Անձնագրիս ժամկետն անցել է, հիմա էլ թոշակ չեն տալիս», «ոչ առողջություն ունենք, ոչ էլ, արդեն 73 ամյա կին եմ, էս նույն դիրքով երեք ժամ է կանգնած եմ»,«սպասում ենք, հլը մինչև 5-ն էլ կսպասենք»,- տարբեր կողմերից նշում էին քաղաքացիները: Շենգավիթի անձնագրային բաժանմունքի պետ Նաիրա Բարսեղյանը շտապում է հանդարտեցնել կրքերը: Նրա խոսքերով` կուտակումները պայմանավորված են երկու հանգամանքով. «Առաջին` մի քանի օր առաջ կառավարությունում ինտերնետ կապը խափանվել էր, սակայն շատ արագ այդ հարցը կարգավորվել էր, երկրորդն էլ, որ տոնական օրեր են եղել, և չեն հասցրել ժամանակին քաղաքացիներին սպասարկել»: Նոր համակարգի ներդրմամբ քաղաքացին կարող է դիմել ցանկացած անձնագրային բաժանմունք` անկախ բնակության վայրից. «Ուստի, բացի Շենգավիթի բնակիչներից, կան նաև բնակիչներ մարզերից ու մյուս համայնքներից»,- ասում է տիկին Բարսեղյանը: Նա նաև նշեց, որ կուտակումներն ազդել են իրենց աշխատանքային գրաֆիկի վրա. «Մենք աշխատում ենք առավոտյան 9-ից մինչև 20-ը, փորձում ենք մինչև վերջին քաղաքացին ճանապարհել»: Բաժանմունքի պետն իր հերթին խոստացավ, որ օրեր անց նման կուտակումներ այլևս չենք տեսնի. «Երեք օր հետո խոստանում ենք, որ այս հարցերը շտկված կլինեն»: Այս առնչությամբ այսօր հաղորդագրություն է տարածել նաև ոստիկանությունը` նշելով, որ կարճ ժամանակում կվերականգնվի անձնագրային ծառայություների մատուցման բնականոն ընթացքը:
