Վարդան Այվազյանը թույլ չէր տալիս հարց ուղղել
ՀՀԿ պատգամավոր, ԱԺ Տնտեսական հարցերի մշտական հանձնաժողովի նախագահ Վարդան Այվազյանն այսօր 2013թ. պետական բյուջեի կատարողականի քննարկմանը պարծեցավ, որ այս տարի ռեկորդ են սահմանել: Ինչպես ինքն ասաց՝ ի տարբերություն նախորդ տարիների, երբ իր ղեկավարած հանձնաժողովին վերաբերող ոլորտների բյուջեների քննարկումները հազիվ ավարտվում էին երեկոյան ժամը 5-ին, ապա այս տարի քիչ անց կավարտեն: Միգուցե պատճառն այն է, որ պարոն Այվազյանն այսօր պատգամավորներին թույլ չէր տալիս ֆինանսական հարցերից բացի, այլ հարցեր ուղղել զեկուցողներին: Այդ առումով նրա նկատողությունները հիմնականում ուղղված էին ԱԺ պատգամավոր Խաչատուր Քոքոբելյանին: Վարդան Այվազյանը նրան նախ թույլ չտվեց հարց ուղղել «Որոտանի» ՀԷԿ-ի շահագործման հետ կապված. «Կոչ եմ անում միայն բյուջեի քննարկմանը վերաբերող հարցեր ուղղել, բովանդակային հարցերը թողնել հետո, քանի որ մենք այսօր շատ հարցեր ունենք»: Վարդան Այվազյանը պատգամավորին հնարավորություն չտվեց նաեւ ստանալ իր հարցի պատասխանը՝ ուղղված ՏՄՊՊՀ նախագահ Արտակ Շաբոյանին: Վերջինս պատրաստակամություն հայտնեց պատասխանելու պարոն Քոքոբելյանի հարցին, թե հանձնաժողովն ինչ աշխատանքներ է իրականացրել անցած տարի կամ ինչ հակամենաշնորհային փաստեր է արձանագրել: «Միայն խնդրում եմ նորից չասեք, օրինակ, ձվի շուկան: Դա ամեն տարի լսում ենք»,- նկատեց Խաչատուր Քոքոբելյանը: Վարդան Այվազյանը նորից միջամտեց ու առաջարկեց նմանատիպ քննարկումները տեղափոխել իր սենյակ, որտեղ բովանդակային առումով կարող են բանավիճել այդ հարցերի շուրջ՝ հենց լրատվամիջոցների ներկայությամբ:
