Դանդաղ պատերազմ է գնում. ՊՆ խոսնակ
ՊՆ մամուլի խոսնակ Արծրուն Հովհաննիսյանը նպատակահարմար չի համարում սահմանին հնչած ամեն մի կրակոցից հետո հաղորդագրություն տարածել։ «Օրվա մեջ առնվազն տասն անգամ լուր ենք ստանում։ Դեպք չեմ հիշում, որ ինչ-որ բան թաքցրել ենք։ Մանավանդ քաղաքացիական բնակչության պարագայում խնդիր կա, ես իրավասու չեմ այդ մարդու անունը ձեզ տամ»,- նշեց Արծրուն Հովհաննիսյանը։ Հիշեցնենք, երեկ ուշ երեկոյան հերթական անգամ ադրբեջանական կողմից գնդակոծություն է սկսվել Տավուշի մարզի սահմանամերձ Ներքին Կարմիր աղբյուր գյուղի ուղղությամբ, որի պատճառով խաղաղ բնակիչ է զոհվել։ «Սա անպատասխան չի մնա միանշանակ, մենք ի տարբերություն իրենց, քաղաքացիական բնակչության հետ կռիվ չունենք անելու, մենք մեր հակառակորդին լավ ենք ճանաչում՝ խրամատում նստած զինվորն է»,- ավելացրեց ՊՆ մամուլի խոսնակը։ Ընդհանրապես անդրադառնալով սահմանին տիրող իրավիճակին՝ պարոն Հովհաննիսյանը նշեց, որ դանդաղ պատերազմ է գնում։ «Պատերազմում եթե մի օր պարտվենք, մենք ոչ թե զոհ կունենանք, այլ դիրքեր կկորցնենք, իսկ դիրքերը ոչ թե ինչ- որ մի հենակետ, այլ ծանր բաներ։ Եթե ամեն օր իրենց խախտումներին պատասխան չտանք, եթե ամեն օր իրենց ոտնձգություններին պատասխան չտանք, ապա կսկսենք պատերազմում պարտություններ կրել»,- եզրափակեց Արծրուն Հովհաննիսյանը։
