ԳՅՈՒՂԵՐՈՒՄ ՈՒՍՈՒՑԻՉՆԵՐ ՉԿԱՆ
Աջակցիր «Ա1+»-ինԿրթական ոլորտում իրականացված օպտիմալացման ծրագրով նախատեսվում էր գյուղական համայնքների դպրոցները համալրել մասնագետ ուսուցիչներով,սակայն այս խնդիրը մինչ օրս Շիրակի մարզում վերջնականապես լուծված չէ եւ գյուղական համայնքներում դեռ ուսուցիչների պակաս կա:
Եթե նախորդ 2 տարիների ընթացքում գյուղական վայրեր է գործուղվել 69 մանկավարժ, ապա այս տարի այդ ցուցանիշը ցածր է. գյուղական դպրոցներում աշխատելու է մեկնել 12 մանկավարժ: Շիրակի մարզի կրթության վարչության գլխավոր մասնագետ Ջեմմա Ավետիսյանը չժխտեց , որ այսօր աշխատանքը կորցրած ուսուցիչների մեծ բանակ կա դեռ, եւ քչերն են ցանկություն հայտնում իրենց առաջարկած պայմաններով աշխատել:
Հիմնականում մանկավարժների պահանջ կա այն գյուղական դպրոցներում, որտեղ տվյալ առարկայի դասավանդման համար մեկ դրույքաչափը չի ապահովվում: Վիճակը կարգավորելու համար կրթական ոլորտի մասնագետները ելքեր են որոնում: Արդյունքում պարզվել է, որ նման դեպքերում անհրաժեշտ է 2 առարկա տիրապետող մասնագետ, ով կկարողանա աշխատել մեկից ավելի համայնքներում: Նշենք, որ սահմանամերձ եւ լեռնային գյուղերում գործուղված ուսուցիչների համար դեռ առաջարկվում են նախկին պայմանները՝ աշխատավարձից զատ նրանց հատկացվում է ամսական 15հզ դրամ՝ բնակարանի վարձի եւ կոմունալ ծախսերի համար:
