Հայաստանը «Եվրատեսիլ 2015»-ի եզրափակիչ փուլ անցավ
Ավստրիայի մայրաքաղաք Վիենայում ավարտվեց «Եվրատեսիլ-2015» մրցույթի առաջին կիսազրափակիչը: Հայաստանը ներկայացնող Genealogy խումբը «Face The Shadow» երգով հանդես եկավ երկրորդ համարի ներքո: Մեր երկրի 6 պատվիրակները բեմում մի պատմություն պատմեցին ոչ միայն երգի, այլ նաեւ ձեւավորման ու էֆեկտների միջոցով: Երգի վերջին հատվածը Genealogy-ի անդամներից յուրաքանչյուրը երգեց բեմի հատակին պատկերված քարտեզի վրա` կանգնելով իր ծննդավայրում, իսկ վերջում նրանք համախմբվեցին Հայաստանում: Ի դեպ, «Եվրատեսիլ 2015» երգի մրցույթից պաշտոնական բացումից առաջ աշխարհահռչակ երգիչ Շառլ Ազնավուրը Ֆեյսբուքի իր պաշտոնական էջում հաջողություն էր մաղթել Genealogy խմբին: Նա գրել է. «Հինգ աշխարհամասից երիտասարդ հայեր իրենց բախտն են փորձելու «Եվրատեսիլ» երգի միջազգային մրցույթում: Ես ողջունում եմ ձեզ ընկերաբար և մաղթում լավագույնը: Յուրաքանչյուր սիրտ ձեզ հետ է»: Կիսաեզրափակչին մասնակցում էր 16 երկիր: Եզրափակիչ փուլում հայտնվեցին նրանցից տասը` Ալբանիան, Հայաստանը, Ռուսաստանը, Ռումինիան, Հունգարիան, Հունաստանը, Էստոնիան, Վրաստանը, Սերբիան եւ Բելգիան: Եվրատեսիլի եզրափակիչը տեղի կունենա մայիսի 23-ին:
