Մարիա Շարապովան շարունակում է մարզումները
Ռուս թենիսիստուհի Մարիա Շարապովան երկու օր առաջ չնայած հայտնվել է դոպինգ սկանդալի կենտրոնում, սակայն շարունակում է ակտիվ մարզումները:
Ինչպես նշում է անգլիական «Միրոր» թերթը, 28-ամյա մարզուհին այժմ բացօթյա պարապմունքներ է անցկացնում Լոս Անջելեսի ծովափին: Նա շարունակում է կրել նաեւ «Նայք» ընկերության մարզահագուստ, չնայած այն խզել է թենիսիստուհու հետ կնքած համագործակցության պայմանագիրը:
Հիշեցնենք, որ 2016 թվականի թենիսի Ավստրալիայի բաց առաջնության ժամանակ Մարիա Շարապովայի դոպինգ թեսթը դրական արդյունք է տվել: Մարտի 7-ին ռուս թենիսիստուհին հատուկ մամուլի ասուլիս է կազմակերպել, որի ժամանակ հայտարարել է այդ մասին:
Ինչպես նշում են սպորտային լրատվամիջոցները, Մարիա Շարապովան ինքնախոստովանության միջոցով, փաստորեն, մեղմացրել է իր պատիժը: Այժմ նրան սպառնում է ոչ թե չորս, այլ մեկ տարվա որակազրկում:
Շարապովան նաեւ սոցիալական ցանցերում գրառում է կատարել՝ շնորհակալություն հայտնելով իրեն աջակցողներին՝ իր համար այս դժվար օրերին։
