Հայկական ռոբոտները կարող էին նվազեցնել սահմանում զոհերի թիվը
Հայաստանի տարբեր դպրոցներից եւ ուսումնական կենտրոններից 11 թիմ այսօր մրցում են, որպեսզի ական փնտրող իրենց ռոբոտը ճանաչվի լավագույնը:
Մրցույթում հաղթելու համար պահանջվում է, որպեսզի պատրաստված ռոբոտը շրջանցի բոլոր խոչընդոտներն ու գտնի մինչեւ 3 սմ խորության վրա արհեստական խոտածածկի տակ պահված ականները, նշի գտնվելու վայրը եւ ականների դասավորությամբ էլեկտրոնային քարտեզ ուղարկի համակարգչին:
Հիմնականում դպրոցականներից կազմված թիմերը մարտական են տրամադրված։ Ասում են՝ ռոբոտ ստեղծելը դժվար չէ, հատկապես երբ աշխատում են թիմով; Երեխաները վստահեցնում են՝ կարեւոր է միայն ֆիզիկայի, մաթեմատիկայի իմացություն ու լավ տրամաբանություն:
Վանաձորի «Կրթական կամուրջ» ուսումնական հաստատության ռոբոտաշինության խմբավար Անուշ Թորոսյանն ասում է, որ պատանիները հետաքրքրված են ոլորտով։ Համոզված է, որ ապագայում այսօր մրցույթին մասնակցող երեխաները մեծ հաջողությունների են հասնելու ռոբոտաշինության ոլորտում։
Վեդու ավագ դպրոցի թիմի համար ական փնտրող ռոբոտը արդեն երրորդ աշխատանքն է: Նրանք ստեղծել են ժապավեն կտրող ռոբոտ, որն, ի դեպ, Դիջիթեք էքսպոյի բացումն է կատարել, իսկ մյուս ստեղծագործությունը ԲՕՌ անունով ռոբոտն է՝ բանակին օգտակար ռոբոտը։ «Ռոբոտը երեք մասից է բաղկացած, մեկը անանցանելի վայրերում զինվորներին բուժօգնություն տանելու համար է, մեկը նռնակ է նետում թշնամու դիրքերի վրա, մյուսն էլ ռումբ»,- պատմում է թիմի մասնակիցներից մեկը ու վստահեցնում, որ իրենց ստեղծած ռոբոտները կարող են բանակի մի մասը դառնալ ու նվազեցնել նաեւ մարդկային կորուստները:
«Ռոբոտը գտնելով ականը՝ կանգնում է, ֆիքսում է տեղը, որոշում է իր կոորդինատը տարածության մեջ եւ դա գրում է հիշողության քարտի վրա։ Այն ռոբոտի աշխատանքից հետո հանում ենք, միացնում ենք համակարգչին եւ տեսնում որտեղ է ականը»,- այսպես է իր ստեղծած ռոբոտի մեխանիզմը բացատրում Ռաֆայել Դարբինյանը Վանաձորի թիվ 5 դպրոցից, ու վստահեցնում, որ այս ամենն ինքն ու իր ընկերներն անում են, որ գոնե տարիներ հետո, հետախույզներին ամբողջությամբ փոխարինեն ռոբոտները եւ վնասներն, ըստ այդմ, քիչ լինեն:
Գյումրու պոլիտեխնիկական համալսարանի թիմի ավագ Դավիթ Նիկողոսյանն էլ համոզված է, որ այս պատանիները դպրոցն ավարտելուց հետո բարձրորակ մասնագետներ կլինեն եւ կդառնան հայ ռոբոտաշինության ապագան:
Մրցույթի հաղթողների անունները պարզ կլինեն մի քանի օրից։
