Հայկական կողմից զոհեր եւ վիրավորներ չկան. Դավիթ Բաբայան
Անցած գիշեր եւ այսօր առավոտվանից շփման գծի որոշ հատվածներում ադրբեջանական զինուժի իրականացած սադրիչ գործողությունների արդյունքում հայկական կողմից զոհեր եւ վիրավորներ չկան: Այս մասին այսօր «Ա1+»-ի հետ զրույցում ասաց ԼՂՀ նախագահի մամուլի խոսնակ Դավիթ Բաբայանը: «Իրավիճակը սահմանին այն է, ինչ եղել է մշտապես, որեւէ արտառոց բան տեղի չի ունենում: Հակառակորդը երբեք էլ չի դադարեցրել կրակոցները, մի օր ավելի շատ են կրակում, մի օր ավելի քիչ: Սահմանին կանգնած մեր տղաների համար սա սովորական բան է, սա մեր առօրյան է»,-ասաց Դավիթ Բաբայանը, հավելելով, որ իրավիճակն այս պահին վերահսկելի է: «Նրանք շատ ավելի մեծ տրամաչափի զինտեխնիկայով էլ են կրակել։ Կրակել են անգամ 120 մմ անոց հրազենով: Մեր տղաները ամուր են, հիմա շատ կարևոր է, որ թիկունքը եւս ամուր լինի: Նման գործողություններով հակառակորդը շատ հաճախ հենց նպատակ ունի թիկունքում խուճապ առաջացնել»,-ընդգծեց ԼՂՀ նախագահի մամուլի խոսնակը: Ինչ վերաբերում է Ադրբեջանում անցկացվելիք զորավարժություններին, ապա սահմանին նման ակտիվությունը դրանց հետ կապելը Բաբայանը ճիշտ չի համարում: «Նրանք կրակել են եւ զորավարժությունից առաջ, կկրակեն եւ զորավարժությունների ժամանակ, եւ դրանցից հետո»,-ասաց նա: Հիշեցնենք, որ այսօր առավոտվանից շփման գծի որոշ հատվածներում ադրբեջանական զինուժը շարունակում է իրականացնել սադրիչ գործողություններ: Մասնավորապես` ժամը 12:15-ից սկսած, հակառակորդը 60 և 82 միլիմետրանոց ականանետերից արկակոծում է առաջնագծի հյուսիսարևելյան (Թալիշ և Յարըմջա) ուղղությամբ տեղակայված պաշտպանության բանակի մարտական դիրքերը: Հատկապես ինտենսիվ արկակոծության են ենթարկվում Յարըմջա գյուղի ուղղությամբ տեղակայված մարտական հենակետերը: Հակառակորդի նախահարձակ ակտիվությունը ճնշելու համար ՊԲ առաջապահ զորամասերը ձեռնարկում են պատասխան գործողություններ:
