«Տարօրինակ է, որ ընդդիմադիրների խիղճը տարել է դեպի ՀՀԿ»
ԵԼՔ դաշինքի խմբակցության անդամ Նիկոլ Փաշինյանն այսօր Ծառուկյան դաշինքի ԱԺ փոխնախագահի թեկնածու Միքայել Մելքումյանից հետաքրքրվեց՝ ինչու է ԱԺ նախագահի իրենց թեկնածուի օգտին քվեարկել 12 պատգամավոր, երբ ընդդիմադիր երկու խմբակցությունների թեկնածուների թիվը 40-ն է՝ 9 պատգամավոր ԵԼՔ-ից եւ 31 պատգամավոր Ծառուկյան դաշինքից: «Ծառուկյան դաշինքը քննարկել է այս խնդիրը եւ ընդունել քաղաքական որոշում՝ թողնել ազատ, այսինքն` յուրաքանչյուրը քննարկում է խղճի մտոք, ինչպես գտնում են նպատակահարմար»,- պարզաբանեց Միքայել Մելքումյանը: Իսկ Նիկոլ Փաշինյանն արձագանքեց. «Տարօրինակ եւ ցավալի է, որ ընդդիմադիր խմբակցության անդամների խիղճը նրանց տարել է դեպի Հանրապետական իշխող կուսակցություն, այլ ոչ թե հակառակը»: Այնուհետեւ ԵԼՔ-ի պատգամավորը նշեց, որ թեեւ Ծառուկյան դաշինքի ընդդիմադիր խմբակցությունը կողմ չի արտահայտվել ԵԼՔ-ի թեկնածուի օգտին, այնուամենայնիվ, իրենց խմբակցությունը կողմ կարտահայտվի Ծառուկյան դաշինքի թեկնածուի օգտին եւ դեմ կարտահայտվի Հանրապետականի թեկնածուին: 6-րդ գումարման ԱԺ անդրանիկ նիստի այսօրվա աշխատանքը ավարտվեց: Փոխնախագահների ընտրության քվեարկությունը կսկսվի առավոտյան ժամը 10։00-ից եւ կտեւի մինչեւ 10։40-ը:
