Սամվել Ալեքսանյանի ընտանիքին պատկանող ԲԿ-ն մոլորեցնում է հիվանդներին (տեսանյութ)
«Աստղիկ» բժշկական կենտրոնում հեմոդիալիզ ստացող Ռուբեն Մնացականյանը երկու օր առաջ իմացել է, որ պետք է վճարի այդ ծառայության համար: ԲԿ-ի տնօրինությունը պատճառաբանել է, թե պետական պատվերով տրամադրված գումարները սպառվել են. «Մեզ ասեցին պետությունը էլ չի վճարելու, իսկ հիվանդանոցը նման միջոցներ չունի, ու սեպտեմբերից ով ուզում է դիալիզ ընդունի, ինքը պետք է վճարի 18.100 դրամ՝ ամեն մի դիալիզի համար»,- ասում է Ռուբեն Մնացականյանը Այս գործընթացում ոչինչ չի փոխվել, վստահեցնում են առողջապահության նախարարությունում: Իսկ թե որն է եղել «Աստղիկ» ԲԿ-ի նման հայտարարության պատճառը նախարարությունում չգիտեն: Դեռ ավելին, նախորդ շաբաթ կառավարությունը որոշում է ընդունել ավելացնել հեմոդիալիզի ծառայությանը տրամադրվող գումարները ՝ 216 մլն 820 հազար դրամով։Պատճառը հիվանդների թվի աճն է: Կանխատեսվում է, որ մինչեւ 2020 թվականը հանրապետությունում այս ծառայությունից տարեկան կօգտվի 1000 հիվանդ՝ ներկայիս 850-ի փոխարեն: «Ակնկալվում էր, որ մինչեւ տարեվերջ ունենալու էինք դեֆիցիտ, մենք որոշեցինք ոչ թե տարեվերջին լարված պահել բոլորին, այլ նախապես այս հարցը լուծել, որ իմանան դեֆիցիտ չի լինի»,- ասում է Բժշկական օգնության քաղաքականության վարչության պետի պաշտոնակատար Դավիթ Մելիք- Նուբարյանը: «Աստղիկ» ԲԿ-ում վստահեցնում են, որ նման հայտարարություն են տարածել, քանի որ պետության տրամադրած գումարը վերջացել էր: Այս վարկածը նախարարությունում բացառում են. «Ես մեծ հավանականությամբ պնդում եմ, որ այդ պահի դրությամբ, այդ գումարը ավարտված չէր կարող լինել»,- ասում է Դավիթ Մելիք- Նուբարյանը: Հեմոդիալիզ ստացող հիվանդների մեծ մասը առաջին կամ երկրորդ կարգի հաշմանդամություն ունեցող մարդիկ են: Այսօր նախարարության մոտ հավաքված մարդիկ բողոքում էին նաեւ, որ իրենց ստացած հաշմանդամության թոշակով անգամ տարրական խնդիրներ չեն կարողանում լուծել: Այս խնդիրների մասին առողջապահության նախարարությունում գիտեն, բայց լուծումները դեռեւս մշակված չեն: Հավելյալ դեղերի ու ծառայությունների անվճար տրամադրումը դեռեւս չի իրականացվի՝ ֆինանսների բացակայության պատճառով: Հիշեցնենք, «Աստղիկ» ԲԿ-ն պատկանում է ՀՀԿ գործարար պատգամավոր Սամվել Ալեքսանյանին։
