«Ո՞ւմ է պատկանելու Հայաստանում ներման իրավունքը» (տեսանյութ)
ԱԺ Պետա-իրավական հանձնաժողովում քննարկվում էր «Ներման մասին» նախագիծը։ Ըստ օրինագծի՝ վարչապետն է լինելու նախագահին միջնորդողը, որպեսզի ներում շնորհի դատապարտյալին։ Վերջինս անձամբ է խնդրագիր ներկայացնելու, սակայն հստակ չափանիշներ չկան, որ դեպքում անձը կարող է ներվել, որ դեպքում՝ոչ: «Ելք» խմբակցության պատգամավոր Էդմոն Մարուքյանը ասում է, որ հակասահմանադրական նախագիծ է. «Սա նախագահի ձեռքից ներման իրավունքը վերցնելու նախագիծ է: Նախագահը պետք է քննարկի դիմումը եւ ներում շնորհի: Ոչ թե վարչապետը առաջարկի, քննարկի եւ ներկայացնի նախագիծը: Սահմանադրությանը հակասող նախագիծ է»: «Ծառուկյան» խմբակցության պատգամավոր Գեւորգ Պետրոսյանն էլ նշեց, որ սուբեյկտիվություն դրսեւորելու մեծ հնարավորություն կա, ուստի հստակ քաղաքականություն պետք է լինի այս ոլորտում. «Ընտրության ժամանակ մեկը չակերտավոր ծառայություն է մատուցել այս կամ այն թեկնածուի ընտրվելուն, նրա դիմումը կարող է ներվել, իսկ այն մեկը ով ընդդիմադիր հայացքներ է ունեցել, նրան ուղարկում են, քանի որ գործող օրենսդրությունը հստակ չափանիշներ չի ամրագրում , այսպես ենք հարմար գտել»,- ասաց պատգամավորը: Արդարադատության փոխնախարար Սուրեն Քրմոյանը մեջբերեց միջազգային փորձը եւ ընդգծեց, որ Իսպանիայի թագավորությունում ընդհանրապես չկան չափանիշներ, Բելգիայի թագավորություն էլ հիմք է ընդունվում միայն դատապարտյալի անձնական գործում առկա տվյալները. «Տարբեր տեղեր մենք նայել ենք, հստակ չափանիշներ չկան, թողնված է համապատասխան լիազորություններ ունեցող անձին: Այնուհանդերձ մենք փորձել ենք նշել, թե ինչ է քննարկվելու, որպեսզի պատժի կրման ընթացքում իր պատշաճ վարքագիծը կարողանա ամրագրի»: Սակայն ներման խնդրագրի բովանդակությունն է հստակ կարգավորվել. « Հստակ սահմանվել է ինչ պետք է պարունակի ներման խնդրագիրը, դատապարտյալի վերաբերմունքը իր կատարած հանցանքի վերաբերյալ եւ ներման խնդրագիրը պայմանավորող այլ հանգամանքներ: Դատապարտյալը ինքը եւս պետք է հիմնավորի, ինչու պետք է իրեն ներում շնորհեն, քննարկվելու են ուսումնասիրվող հանգամանքները՝ դա դատապարտյալի անձն է, կատարած հանցանքի վերաբերյալ վերաբերմունքը, դրսեւորած վարքագիծը, ռեցեդիվի առկայությունը, առողջական վիճակը, ինչպես նաեւ այն հանգամանքը, արդյոք նախկինում դատապարտյալը օգտվել է քրեական օրենսգրքով ամրագրված այնպիսի ինստիտուտներից, ինչպիսին են ներումը, համաներումը, կամ վաղակետ ազատ արձակելը»,- ասաց Արդարադատության փոխնախարար, հիմնական զեկուցող Սուրեն Քրմոյանը: Ի դեպ, նախագծով սահմանվել է նաեւ մերժելու դեպքում, նոր խնդրագրեր ներկայացնելու ժամկետները: Նոր միջնորդություն կարող են ներկայացնել մեկ տարի հետո, երբ բացառիկ որեւէ հանգամանք չկա:
