Ոչ մի արտառոց բան չկա, եթե նախկինում նախագահին տրված լիազորություները փոխանցվում են վարչապետին
Ժառանգության փոխնախագահ Արմեն Մարտիրոսյանն այսօր լրագրողների հետ հանդիպման ժամանակ նշեց, որ վարչապետի ձեռքում իշխանության գերկենտրոնացում է։ «Դեմոկրատական երկրներում, որոնք պառլամենտական կառավարման համակարգ ունեն, պառլամենտն է դոմինանտ։ Հայաստանը չնայած որ պառլամենտական է, սակայն պառլամենտը դոմինանտ չէ» ,- ասում է Արմեն Մարտիրոսյանը։ Հիշեցնենք, որ խորհրդարան է ներկայացվել «Պետական կառավարման համակարգի մարմինների մասին» և «Կառավարության կառուցվածքի և գործունեության մասին» օրենքների նախագծեր, որոնց ընդունման դեպքում 2017թ․ ապրիլի 9-ից հետո, իրավապահ կառույցները, մասնավորապես՝ Ոստիկանությունը, ԱԱԾ-ը, Պետական պահպանության և պետական վերահսկողական ծառայությունը լինելու են ոչ թե կառավարությանն առընթեր, (ներկայումս այդպես է) այլ բացառապես վարչապետին ենթակա մարմիններ։ Նրանց ղեկավարներին ու տեղակալներին նշանակելու և ազատելու է վարչապետը։ Իշխանության ներկայացուցիչները նշում են, որ ոչ մի արտառոց բան չկա, եթե նախկինում նախագահին տրված այդ լիազորություները փոխանցվում են վարչապետին։ Քաղաքագետ Արմեն Գրիգորյանն այս փաստարկը անհիմն է համարում։ «Այն ժամանակ գոնե դե յուրե կառավարությունը անջատված էր և նախագահին որոշակի զսպող լծակ ուներ։ Հիմա վարչապետին զսպող ոչ մի մեխանիզմ չի լինում»,-ասում է Արմեն Գրիգորյանը։ Միաժամանակ, «Կառավարության կառուցվածքի և գործունեության մասին» օրենքի նախագիծով նախատեսվում է, որ Կառավարության նիստերը պետք է դռնփակ լինեն: Քաղաքագետ Արմեն Գրիգորյանն անդրադառնալով արդարադատության նախարարի խոսքին, թե շատ երկրներում է կառավարության նիստերն անցնում դռնփակ, նշում է. «Եթե մի երկրում կա նման երևույթ, չի նշանակում թե պետք է կրկնօրինակել։ Դռնփակ նիստերը բոլորիս էլ պարզ է, որ արվում են մեկ մարդու համար՝ Սերժ Սարգսյանի»։ Ըստ Արմեն Գրիգորյանի՝ Սերժ Սարգսյանին հատուկ է մեկ գիշերում որոշումներ կայացնել և կառավարության դռնփակ նիստերը հենց դրա համար են։
