Բացել լրահոսը Փակել լրահոսը
A A

Երթուղին փակ էր

Մարզեր

         Այսօր Վանաձորի ավտոկայանում անսովոր հանգստություն էր տիրում' Վանաձոր-Երևան երթուղին փակ էր:     

 Իսկ պատճառը Երևանում սպասվող ՀԱԿ-ի հանրահավաքն է:

 «Կանանց կարելի է, ո՞վ է ասում չեն տանում, կին լինեի' ես էլ վաղուց գնացած կլինեի, հենց նոր մի Գազել եկավ,  4-5 կին էին կանգնած, նրանց տարան մեզ չեն թողնում»,-ասաց  քաղաքացիներից մեկը:

Երբ ուղեւորների դժգոհությունները սաստկացան , աղմուկին վրա հասած երթակարգավորման կայանի պետ Գարիկ Խաչատրյանը տեղեկացրեց.

 «Կգնաք ժամը 16.00-ին»: Հիշյալ թեմայի շուրջ բոլոր հարցերին նա պատասխանում էր. «Ինձ էլ է հետաքրիր պատճառը, ու ոչ մեկը չի կարող ասել,- ապա խույս տալու համար ասաց,-հանգստյան օր է, չի կարելի»:

  Հարցերից խուսափում էին նաև   վարորդները ,  բոլորը նույնն էին ասում. «Էսօր իմ հանգստյան օրն է»:  

 Անհատ տաքսի ծառայության աշխատակիցը, որ   չցանկացավ ներկայանալ,ասաց, որ ինքն արդեն 2 երթ է կատարել.«Ճիշտ է դժվար է գնալը, ճանապարհին  կանգնացնում են,մեքենան ստուգում են, փաստաթղթերն ու ժողովրդի վեշը ստուգում են, որ զենք-զինամթերք չունենան  ու թողնում են գնան' անհնարին չի»:

 «Վանաձոր» տաքսի ծառայությունը, որ կայանվում է ավտոկայանի տարածքում, մինչև ժամը 11-ը 12 երթ էր կատարել, դեպի Երևան: Վարորդները  հավատացրեցին, որ ճանապարհներին, որևէ խնդիր չի լինում, եթե մեքենայում տղամարդ չի լինում, նույնիսկ չեն կանգնեցնում:

 Ի դեպ, ավտոկայանում միայն 1 ուղևոր էր գնում հանրահավաքի,ՀԱԿ-ի անդամ Հրաչյա Համբարյանը:  Նա ամենևին չզարմացավ ստեղծված իրավիճակից. «Սա առաջին դեպքը չի, ամեն անգամ  հանրահավաքներին փակում են, էս  ձևով փորձում են փակել խոսողի բերանը, լսողի ականջները,գնացողի  ոտքերը, բայց գնացողն ամեն դեպքում գնում է»:

  Երևան գնացող ուղևորների մի մասը օգտվեցին տաքսի ծառայուններից, մի մասն էլ հրաժարվեցին գումարի պատճառով և նախընտրեցին սպասել մինչև ժամը 16.00-ը:

 Նելլի Դավթյան

Վանաձոր