Խորհրդարանը' ներսո՞ւմ, թե՞ դրսում
Աջակցիր «Ա1+»-ինՍերժ Սարգսյանի կարգադրությամբ, հայ-թուրքական երկկողմ հարաբերությունների զարգացման եւ երկու երկրների միջեւ դիվանագիտական հարաբերություններ հաստատելու մասին արձանագրությունների փաթեթը ուղարկվել է Ազգային ժողով՝ ստորագրված արձանագրությունների վավերացման գործընթացը սկսելու համար։
«Ժառանգություն» կուսակցությունը հայտարարել է, թե այն օրը, երբ խորհրդարանում կքննարկվեն արձանագրությունները, իրենք բողոքի ակցիա կանցկացնեն ԱԺ դարպասների մոտ:
«Ա1+»-ի հարցերին պատասխանում է «Ժառանգության խմբակցության ղեկավար Ստեփան Սաֆարյանը:
- Պարոն Սաֆարյան, «Ժառանգությունն» իր վրդովմունքն է արտահայտել այն փաստի առթիվ, որ Սերժ Սարգսյանը արձանագրություններն ուղարկել է խորհրդարան, մի՞թե չէիք սպասում:
-Մենք ուզում էինք հավատալ մինչ այդ, որ Հանրապետության նախագահը իր խոսքի տեր է: Ես ուզում եմ հիշեցնել , որ դեռևս ամիսներ առաջ նա հայտարարեց, որ չի վավերացնի արձանագրությունները, քանի դեռ Թուրքիան չի վավերացրել, և ավելին, եթե Թուրքիան ժամանակ ձգի, ինչը ակնհայտ արվում է այսօր, ապա նա համապատասխան հանձնարարություն կտա իր աշխատակիցներին' փոփոխություններ կատարել «Միջազգային պայմանագրերի մասին» օրենքում և ետ վերցնել Հայաստանի Հանրապետության ստորագրությունը: Այսպիսի խոսքերը ամենևին չեն ընկալվում իբրև շուտափույթ վավերացման կամ արձանագրությունները վավերացման ներկայացնելու փաստ:
Եվ մենք ուղղակի վրդովված ենք, որ մեր երկրի ղեկավարը կարող է անլուրջ մոտեցում ցուցաբերել' ուղղակի մի օր անել մի հայտարարություն և երկրորդ օրը գործել մեկ այլ կերպ: Հետևաբար, մենք վրդովված ենք, որ այսքանից հետո, երբ Թուրքիան ինքը ակնհայտ դարձրեց այս արձանագրություններում իր համար շահեկան ձևակերպումների առկայությունը և նաև ցույց տվեց, որ ժամանակ է ձգձգում նաև գործընթացը շահարկելով, վրդովեցուցիչ է, որ այդ արձանագրությունները կարող էր ներկայացվել ԱԺ-ի վավերացմանը:
-Արձանագրությունները նախագահականից արդեն հասե՞լ են խորհրդարան: Ի՞նչ եք պատրաստվում անել:
-Այս պահին ունեցած տեղեկություններով, այո' արձանագրությունները արդեն հասել են Ազգային ժողով, և «Ժառանգություն» խմբակցությունը պատրաստվում է գրավոր դիմել ԱԺ նախագահին, որ գլխադասային հանձնաժողով նշանակվի ոչ միայն արտաքին հարաբերությունների մշտական հանձնաժողովը, այլ նաև բոլոր տասներկու հանձնաժողովները, ովքեր ԱԺ-ում քննարկումների ընթացքում կներկայացնեն կարծիք:
Այս վերջին մեկ տարվա ընթացքում մեզ ամենատարբեր գայթակղիչ և երևակայական հեռանկարներն են մատուցել բոլորը այն կապակցությամբ, թե որքան բարեբեր հետևանքներ կարող է ունենալ հայ-թուրքական սահմանի բացումը, հարաբերությունների հաստատումը, գյուղատնտեսության, առևտրի և ազատ տեղաշարժի հարցերում:
Եվ մենք գտնում ենք, որ ԱԺ-ի բոլոր գլխադասային հանձնաժողովները պարտավոր են կանխատեսումներ կատարել և հարակից զեկուցմամբ հանդես գալ, ներկայացնելով' թե իրենց իրավասության ներքո գտնվող ոլորտում ինչ հետևանքներ է ունենալու այս արձանագրություններով ստանձնած պարտավորությունները:
- Ըստ Ձեզ, արձանագրությունները ե՞րբ կքննարկվեն խորհրդարանում:
-Այդ որոշումը, կարծում եմ, չի կայացվում Հայաստանի Հանրապետությունում, ինչպես նախկինում կայացված բոլոր որոշումները, որովհետև, եթե մենք դատելու լինենք իշխանությունների հայտարարություններից, մենք միանգամայն այլ իրողություն կունենայինք այսօր, բայց քանի որ նրանց խոսքը և գործը մշտապես հակասել է, հետևաբար, մեզ մնում է ենթադրել, որ նման կարևորագույն հարցերը կայացվում են Հայաստանից դուրս և իշխանությունները պարզապես ամեն մի բարձրաստիճան արտասահմանյան հյուրի այցից հետո, հրապարակում են այդ որոշումները, ինչպես եղավ նաև այս դեպքում:
-Երկու օր առաջ վարչապետը հայտարարեց, թե պահն է արձանագրությունները վավերացնելու: Երկրի առաջին այրերի կողմից նման հայտարարությունների դեպքում ի՞նչ օգուտ կտա Ազգային Ժողովի մոտ ցույց անցկացնելը:
-Մենք, այնուամենայնիվ շարունակելու ենք ժողովրդին մոբիլիզացնել ազգահավաքի կոչով, որպեսզի ժողովուրդը ինքը ներկայացնի իր իսկ շուրթերով իր իսկ բողոքի ակցիաներով սեփական դիրքորոշումը այս արձանագրությունների նկատմամբ:
Մենք պրն վարչապետին և կառավարությանը ավելի լավ տարբերակ էինք առաջարկել, այն է' մինչ ստորագրումը, հիմա էլ մինչ վավերացումը, այս խնդիրը դնել համաժողովրդական հանրաքվեի, և ժողովուրդն է, որ պետք է ասեր արդյո՞ք պահն է վավերացնել և արդյո՞ք պետք է վավերացնել:
Այս հարցերի պատասխանը, կարծում եմ, ավելի ազնիվ և ճիշտ կլիներ լսել ժողովրդից:
- Ձեր կարծիքով ո՞ր ուժերը կմիանան Ձեր բողոքի ակցիային: Եվ ընդհանրապես, հնարավո՞ր է մարդկանց դուրս բերել փողոց' այս առիթով:
-ՀՀ-ում կան հայ-թուրքական արձանագրությունների վավերացմանը դեմ են արտահայտվել մեկ տասնյակից ավել ուժեր և մի քանի տասնյակ հասարակական կազմակերպություններ: Տվյալ պարագայում մեր ակնկալիքը ոչ թե քաղաքական միավորում ստեղծելն է, այլ մեր համար այս խնդիրը վերկուսակցական խնդիր է, համազգային խնդիր, կուսակցական շահերը մի կողմ թողնելու խնդիր է և տվյալ պարագայում, մենք ակնկալում ենք համաքաղաքացիական միավորում: Պարզապես կուսակցությունները կարող են դա ավելի էֆեկտիվ դարձնել, քանի որ կուսակցություններն են, որ ներկայացնում են հասարակության տարբեր շերտերի շահերը:
Մարդիկ արդեն դուրս են եկել հոկտեմբերի 10-ին, դա պատկառելի թվաքանակ էր, որ երթով շարժվեց դեպի Ծիծեռնակաբերդ և ես կարծում եմ, որ մարդկանց ընդամենը ճիշտ կողմնորոշելու խնդիր է և այս խնդիրն է, որ պետք է լուծեն քաղաքական կուսակցությունները: Տվյալ պարագայում մենք ակնկալում ենք բոլորի մասնակցությունը: Այդ դեպքում իշխանությունները կհամոզվեն' ԱԺ-ն դարպասից նե՞րս է գտնվում, թե՞ դուրս:
