«Այն հիմքը չկա, որ լայնածավալ գործողություններ կսկսեն, բայց Զինված ուժերը պետք է պատրաստ լինեն»
Աջակցիր «Ա1+»-ինԱդրբեջանցիները հոգեբանորեն նույնն են,-ասում է ՀՀ պաշտպանության նախկին նախարար Սեյրան Օհանյանը։
Իր դեմ հարուցված քրեական գործով դատավարությունից առաջ նա անդրադարձել է Տավուշի ուղղությամբ Ադրբեջանի կողմից իրականացվող սադրիչ գործողություններին՝ նշելով, որ այս օրերին առավել կարևոր է ճիշտ և սուտ տեղեկատվության տարբերակումը։
«Հայկական կողմը հստակորեն իրականացրել և իրականացնում է իր առջև դրված խնդիրները, սակայն տեղեկատվության մեծ հոսքերի մեջ պետք է գտնել ճիշտը։ Մեր հասարակության համար հիմք պետք է հանդիսանա ՊՆ-ի կողմից տրված տեղեկությունը»,-ասաց նա։
Նրա խոսքով իրավիճակի սրումը կարող է կապված լինել բանակցային գործընթացի դանդաղ լինելու, միջազգային հանրության վերաբերմունքը փոխելու և ներքաղաքական ճգնաժամը կարգավորելու հետ։ Օհանյանը նշեց նաև, որ պետք է սպասել իրավիճակից բխող ցանկացած հետևանքի․
«Աստված չանի, որ ասա վերածվի լայնածավալ գործողությունների, գտնում եմ այսօր «այն հիմքը չկա, որ լայնածավալ գործողություններ կսկսեն, բայց Զինված ուժերը պետք է պատրաստ լինեն »։
Ի դեպ, լրագրողները նկատեցին, որ դատական ամբողջ նիստի ընթացքում նա հետեւում էր պաշտոնական լրահոսին։
