Բացել լրահոսը Փակել լրահոսը
A A
Մշակույթ

Արվե՞ստ, թե՞ գիտություն. թանգարանային իրերի վիրաբույժները (տեսանյութ)

 

Հայաստանի ազգային պատկերասրահում բացվել է «Արվե՞ստ, թե՞ գիտություն. Երեք վերականգնված կտավի պատմություն. Բաշինջաղյան, Կոջոյան, Սարյան» խորագրով ցուցահանդես։ 

20-րդ դարի հայկական կերպարվեստի երեք վարպետների` Բաշինջաղյանի, Կոջոյանի և Սարյանի վերականգնված կտավների կողքին ցուցադրված են վերականգնման երկարատև ընթացքը ներկայացնող աշխատանքային լուսանկարներն ու բացատրագրերը:

Ցուցասրահներից յուրաքանչյուրում վերարտադրված է վերականգնման արվեստանոցի մի անկյուն՝ աշխատանքային սեղան, նկարակալ, որոնց վրա տեղադրված են պատռվածքներով, ներկաշերտի կորուստներով ու թափվածքներով կտավներ, ինչպես նաև կոտրվածքներով ու բացակայող հատվածներով դեկորատիվ-կիրառական առարկաներ, իսկ մանրադիտակի և ուլտրամանուշակագույն լամպի միջոցով այցելուին հնարավորություն է ընձեռվում զննել առարկաների վնասվածքները, տեսնել նախկինում արված երանգավորումներն ու հետագա միջամտությունները:

«Իր պատմության մեջ պատկերասրահն առաջին անգամ է նման նախագիծ իրականացնում, սակայն ոչ վերջինը»,- բացման խոսքում ասաց ՀԱՊ-ի տնօրեն Մարինա Հակոբյանը։ Նրա խոսքով, այսուհետ վերականգնված լավագույն աշխատանքները կներկայացվեն այցելուների դատին։

Տնօրենը նշեց նաև, որ կտավները վատթարագույն վիճակում էին և մեր հրաշք մասնագետները կարողացան դրանք կյանքի կոչել, իսկ վերականգնման բարդագույն պրոցեսը հովանավորել է մասնավոր ընկերություն, որի շնորհիվ նկարները վերածնվել են։

 «Ա1+»-ի կես-կատակ հարցին, ճի՞շտ է արդյոք, որ վերականգնող մասնագետներին թանգարանային իրերի վիրաբույժներ են կոչում, փորձառու վերականգնող-մասնագետ Ֆյոդր Չալախյանը ժպիտով պատասխանեց․«Երևի թե ինչ-որ նմանություն կա մեր մասնագիտությունների մեջ»։

Russian