Արցախյան հարցի բանակցությունների սկզբունքը համաձայնեցված չէ Մինսկի խմբի համանախագահ ոչ մի երկրի հետ. Աշոտյան (տեսանյութ)
Աջակցիր «Ա1+»-ինԱյս ընտրությունները քաղաքական կայունություն չեն բերելու: Այս կարծիքը ասուլիսում հայտնեց ՀՀԿ փոխնախագահ Արմեն Աշոտյանը: Նրա խոսքով` արտասահմանցի քաղաքական շատ դեմքեր իր հետ զրուցելիս ուրախություն են հայտնում, որ ի վերջո երկրում քաղաքական կայունություն կհաստատվի, սակայն դա այդպես չէ:
«Բոլոր այն մարդկանց արտերկրում, որ թվում է, թե ընտրությունների գրանցված արդյունքները լեգիտիմացնում են Արցախի կորուստը, լեգիտիմացնում են Հայաստանի` Արցախից հրաժարվելու փաստը և լեգիտիմացնում է այն իրողությունը, որ Հայաստանը վերածվել է աշխարհաքաղաքական մանրադրամի, նրանք սխալվում են», - նշեց Աշոտյանը:
Նա նշեց, որ տեղեկացված է վարչապետի պաշտոնակատար Նիկոլ Փաշինյանի վերջին «մոգոնումներից» արցախյան հարցի հետ կապված, թե բանակցությունները պետք է շարունակել այդ սկզբունքով, ոչ թե ինքնորոշման իրավունքի և մադրիդյան այլ 2 սկզբունքների հիման վրա, համաձայնեցված չէ Մինսկի խմբի համանախագահ ոչ մի երկրի հետ:
«Հերթական անգամ նա փորձելու է քաղաքական օրակարգով, արցախյան խնդրով խաղալ մի խաղ, որտեղ չի ունենալու միջազգային բանակցային հանրության աջակցությունն այս հարցի շուրջ», - ասաց Արմեն Աշոտյանը:
Արտաքին գործերի նախարար չունենալու ու այդ գերատեսչության ոչ արդյունավետ աշխատանքների մասին հարցին Աշոտյանն արձագանքեց, որ զարմանում է նման հարցերից. «Ասում եք`ԱԳՆ չունենք, կարելի է մտածել` մնացած ամեն ինչ ունենք: Մենք բանակ չունենք, ՊՆ չունենք, Կառավարություն, ղեկավար չունենք, մտավորական էլիտա չունենք, արժանապատվություն չունենք: Մենք լիքը բան չունեցող ազգ ենք այլևս»:
Ընտրությունների արդյունքներին անդրադառնալով՝ նա նշեց, որ չպետք է Նիկոլ Փաշինյանի վերընտրվելը կապել նախկին ուժերի առաջադրման հետ. չէ՞ որ բացի երեք նախկին նախագահներից և Փաշինյանից կային ևս 22 ուժեր. «Այո, մեջները լիքը դեկորացիաներ կային, բայց կային նաև նոր տեղծված, առողջ, մտավորական, հոգևոր ուժեր: Ոչ բոլոր 22-ն էին դրածոներ: Չընտրեցին: Պետք է արձանագրել, իհարկե, Նիկոլը կեղծել է ընտրությունները: Իմ հաշվարկով` 7-10%: Բայց կեղծել է, ոչ թե հաղթելու համար, այլ առաջին տեղով գնալու»:
Նիկոլ Փաշինյանի արտախորհրդարանական ձևաչափ ստեղծելու մասին հարցին ի պատասխան, նա ասաց. «Շեֆս կասեր` իյա՛, իրո՞ք: Երեք տարի արտախորհրդարանական ընդդիմությունն ամենաուժեղն էր մեր երկրում, ոչ մեկ բանի տեղ չէր դնում, համագործակցում, հիմա ինչ է`իրենց կլիենտների մեծ մասը դուրս է մնացել խորհրդարանից, արտախորհրդարանական պլատֆորմ են ստեղծում»:
