TCF-ի բոլոր պարտատոմսերը տեղաբաշխված են․ նախադեպ է ձեւավորվում

«Քրաուդֆանդինգ Ֆորմուլա ՍՊԸ»-ի՝ TCF-ի բոլոր պարտատոմսերը տեղաբաշխված են՝ առաջարկի վերջնաժամկետից շատ ավելի շուտ։ Հետեւաբար, TCF պարտատոմսերը նախատեսվածից շատ ավելի շուտ կցուցակվեն ֆոնդային բորսայում և հասանելի կլինեն երկրորդային շուկայում։

«Արժեթղթերը վայելեցին մեծ պահանջարկ` վստահության բարձր մակարդակի շնորհիվ։ TCF-ը դարձավ Հայաստանում առաջին թվային ծառայություններ մատուցող ընկերությունը, որ ՀՀ-ում չունենալով հաճախորդներ և չհանդիսանալով հանրությանը ծառայություններ մատուցող ընկերություն, թողարկեց պարտատոմսեր և նման կարճ ժամանակում ամբողջությամբ տեղաբաշխեց դրանք։ Ձևավորվեց  նախադեպ»,-նշվում է ընկերության հաղորդագրության մեջ։

Հիշեցնենք, որ  «Քրաուդֆանդինգ Ֆորմուլա» ՍՊԸ-ն  հանդես էր եկել հետաքրքիր նախաձեռնությամբ՝ դառնալով Հայաստանում առաջին մարքեթինգային գործակալությունը, որը թողարկում է կորպորատիվ պարտատոմսեր։

«Քրաուդֆանդինգ Ֆորմուլա» ՍՊԸ-ն թողարկել էր 4,000 անվանական, ոչ փաստաթղթային պարտատոմս՝ յուրաքանչյուրը 100,000 ՀՀ դրամ անվանական արժեքով: Թողարկման ընդհանուր ծավալը կազմում է 400 միլիոն ՀՀ դրամ: Պարտատոմսերը նախատեսված են շուկայի ազատ շրջանառության համար: Ներդրողների համար գրավիչ է  տարեկան 12.75% եկամտաբերությունը, ինչը զգալիորեն բարձր է բանկային ավանդների միջին տոկոսադրույքներից։

«Քրաուդֆանդինգ Ֆորմուլա»-ն   երկար տարիների փորձ ունի ապրանքանիշերի առաջխաղացման, քրաուդֆանդինգային արշավների կազմակերպման, էլեկտրոնային կոմերցիայի և բազմաբնույթ մարքեթինգային ռազմավարությունների մշակման մեջ:

«Քրաուդֆանդինգ Ֆորմուլա»-ի գրասենյակները տեղակայված են Երեւանում, Նյու Յորքում եւ  Շենժենում։ Արդեն շուրջ տասը տարի լինելով  մարքեթինգի ոլորտում՝ TCF-ն իրականացրել է աշխարհում ամենաշատ՝  թվով միլիոն դոլարը գերազանցող հանրային դրամահավաքի (crowdfunding) արշավներ, և ներկայացված է Forbes ամսագրում, ինչպես նաեւ այլ հեղինակավոր հրատարակություններում։

« Պարտատոմսերի թողարկումն ու ներդրումը կօգնեն ընդարձակել մեր գործունեությունը՝ ավելացնել մեր ներկայացուցչություններն ու նոր բիզնես ուղղություններն աշխարհի տարբեր շուկաներում,  և ավելի դոմինանտ դիրք ունենալ։ Մենք ձգտում ենք ապահովել հուսալի, պրոֆեսիոնալ և վստահելի գործընկերություն՝ նպաստելով հայկական տնտեսության առաջընթացին և նորարարական գաղափարների գործնական կիրառմանը»,- նշում է «Քրաուդֆանդինգ Ֆորմուլա» ՍՊԸ-ի գործադիր տնօրեն Նարեկ Վարդանյանը:

Այս քայլը կարող է նախադեպ ստեղծել հայկական տեխնոլոգիական ոլորտում՝ ցույց տալով կապիտալի ներգրավման այլընտրանքային ուղիների հնարավորությունը։