Ալեն Դելոնը ինչ ունի չունի, վաճառում է
Ֆրանսիացի կինոաստղ Ալեն Դելոնը պատրաստվում է աճուրդի հանել վերջին 50 տարիներին կուտակած ժամացույցների բացառիկ հավաքածուն։
Ապրիլի 5-ին, Փարիզի «Կոռնետ դը Սենսիր» աճուրդի տանը Դելոնի հավաքածուի 100 զույգ ժամացույցները կդրվեն վաճառքի։
Վաճառվելու են աշխարհի առաջին գեղեցիկ տղամարդուն պատկանող «Rolex», «CARTIER», «Breitling» և այլ համաշխարհային ֆիրմաների արտադրության ժամացույցները։
Աճուրդի կազմակերպիչները մտադիր են մարտի 22-24-ը Հոնկոնգում ցուցադրել Դելոնի հավաքածուն, քանի որ հաշվարկները ցույց են տվել, որ Չինաստանը, որտեղ Ալեն Դելոնը ժամանակին շատ սիրված դերասան է եղել, աճուրդին ակտիվ մասնակցություն է ցուցաբերելու,- հաղորդում է ИТАР-ТАСС-ը։
Հատկանշականն այն է, որ ընդամենը մի քանի ամիս առաջ, անցյալ դարի սեքս-խորհրդանիշը աճուրդաի էր հանել իր եզակի գինիների հազվագյուտ հավաքածուն։
Ավելի քան 1000 շիշ գինի անցյալ տարվա նոյեմբերին վաճառվեց Փարիզի Ելիսեյան դաշտերի «Fouquet» ռեստորանում։ Վաճառքից ստացված գումարը երկու անգամ գերազանցել է գինիների համար աճուրդում նախատեսված առավելագույն գինը, կազմելով 250 հազար եվրո։
