Տաքսիստները ակցիա էին կազմակերպել (տեսանյութ)
Դեղին համարանիշները սպիտակով փոխարինելու նպատակը՝ մասնավոր տաքսիների վերացումն է։ Հայտարարում են տաքսիսները, որոնք այսօր բողոքի ակցիա էին կազմակերպել Շենգավիթ համայնքում։
«Դա միայն մեկ նպատակ է հետապնդում, որպեսզի մեծահարուստները բերեն իրենց տաքսիները , որ մենք գնանք իրենց պարկերում աշխատենք»,- նշում է Վովա Աղայանը։
Վարորդների համար անհասկանելի է կառավարության քայլերը՝ սկզբում իրենց ստիպեցին սպիտակ համարանիշները փոխարինել դեղինով, հիմա նորից պահանջում են անցնել սպիտակների:
«Մի կարգին ղեկավար է պետք, որ մի բան որոշեն դա մնա, մարդիկ տարբերում են, նստում են ինչի մասին է խոսքը, մի օր սպիտակ, մի օր դեղին, մի օր կարմիր, մի օր կապույտ, մի օր երկաթից, մի օր թղթից»,- ավելացրեց ակցիայի մասնակիցներից մեկը։
Նրանց կարծիքով կառավարությունն իր ոչ հեռատես քայլերով էլ ավելի է ծանրացնում իրենց սոցիալական վիճակը:
«Եթե ամսվա մեջ մեկ անգամ փլավի վրա կոտլետ էր լինում, այդ կոտլետն էլ վերցրին, մնաց միայն փլավը»,- ավելացրեց նրանցից մեկը։
Տաքսիների դեղին համարանիշները ինքնակպչուն կտրոններով փոխարինելուն, բուժզննման եւ տեխզննման գործառույթները վերացնելու հարցերի շուրջ մարտի 6-ի քննարկում էր կազմակերպել Հանրային խորհրդի ֆինանսատնտեսական եւ բյուջետային հարցերի հանձնաժողովը, ակայն որոշում դեռ չի կայացրել:
