«Բարև Երևան» դաշինքի բարձրացրած ոչ մի հարց առ այսօր լուծում չի ստացել:
Երևանի ավագանու «Բարև Երևան» դաշինքի անդամ Անահիտ Բախշյանն այսօր լրագրողներին հաղորդեց, որ բոլոր խմբակցությունների անդամների կողմից Տարոն Մարգարյանին ուղղված նամակներին պատասխանում են քաղաքապետարանի կազմակերպչական բաժնից, կատարողը, տիկին Բախշյանի խոսքերով` մի աղջիկ է: Ըստ «Բարև Երևան» դաշինքի անդամի` սա անօրինական գործելաոճ է. «Այս հարցը մենք բարձրացրել ենք քաղաքապետի առաջ, հուսանք` խելամիտ լուծում կլինի: Քաղաքապետն ունի 4 տեղակալ, 8 խորհրդական, 5 օգնական, ովքեր ինչ-որ ոլորտների համար պատասխանատու են: Մենք պահանջում ենք, որ այդ ոլորտները ղեկավարող պատասխանատու պաշտոնյան գրի կատարող և ստորագրի քաղաքապետը, որպեսզի մեր համագործակցությունը ստացվի: Ընդ որում` օրենքում գրված է, որ քաղաքապետը պատասխանում է ավագանու անդամների նամակներին, դա օրենքի պահանջ է»,- նշեց տիկին Բախշյանը: Նա նաև հաղորդեց, որ դաշինքը չափազանց ինտենսիվ աշխատանք է ծավալել:
Անահիտ Բախշյանը, խոսելով Երևանի մանկապարտեզների գերբեռնվածության խնդրից, առանձնացրեց թիվ 1 մանկապարտեզը, որը փակվել է 2011 թվականին` վերանորոգման նպատակով: Տիկին Բախշյանն այս խնդրով վեց նամակ է գրել, քաղաքապետարանից ստացել է նույն պատասխանը` «Ուսումնասիրվում է»:
Անահիտ Բախշյանը նաև ասաց, որ դաշինքը դեմ է տրանսպորտի թանկացմանն ու գիտի ելքերը. «Վառելիք ներկրողները գերշահույթներ են ունենում, հետևաբար նրանք թող այդ շահույթների մի մասը որպես սուբսիդ տրամադրեն, տրանսպրտի գինը չբարձրանա»:
