Օգնություն մանուկներին
«Ընդդեմ իրավական կամայականության» ՀԿ-ի Կապանի մասնաճյուղը /Կապանի քաղաքացիական կենտրոն/ և Կապանի երիտասարդ ստեղծագործողները Կապանի քաղաքապետարանի ու քաղաքապետին կից երիտասարդական խորհրդի աջակցությամբ Կապանի Մշակույթի կենտրոնի փոքր դահլիճում կազմակերպեցին «Մանուկների համար` գրքի միջոցով» խորագրով գրական երեկո, որը Կապանի քաղաքացիական կենտրոնի կողմից կազմակերպված բարեգործական բնույթի թվով երրորդ միջոցառումն էր:
Միջոցառումն սկսվեց «Ընդդեմ իրավական կամայականության» ՀԿ-ի Կապանի մասնաճյուղի համակարգող Հրայր Խաչատրյանի ողջույնի խոսքով: Այնուհետև ելույթ ունեցավ Կապանի եվրոպական քոլեջի դասախոս, լեզվաբան, երիտասարդ ստեղծագործողների առաջին համահայկական երիտասարդական «Նուռ» մրցանակաբաշխության մրցանակակիր և «Չբացված էջեր» գրական ակումբի ներկայացուցիչ Հասմիկ Գրիգորյանը, ով միաժամանակ վարեց ամբողջ միջոցառումը: Միջոցառման ընթացքում ներկայացվեցին «Չբացված էջեր» գրական ակումբի երիտասարդ ստեղծագործողների ստեղծագործությունները։
Միջոցառումն ավարտվեց Հ. Խաչատրյանի հրաժեշտի խոսքով, այնուհետև կազմակերպվեց հանգանակություն:
Տոմսերի վաճառքից գոյացած և միջոցառման ընթացքում հանգանակված 60 000 /վաթսուն հազար/ ՀՀ դրամ գումարն ամբողջությամբ տրամադրվեց նույն օրը վիճակահանությամբ որոշված թիվ 6 ՆՈւՀ-ին. «Չբացված էջեր» գրական ակումբի երիտասարդ ստեղծագործողները գրական տեղեկագրի հրատարակման համար նախատեսված գումարից հրաժարվեցին հօգուտ մանուկների:
