Գ. Ջհանգիրյանը Արցախի անկախության ճանաչման մասին նախագծից տեղյակ չէ (տեսանյութ)
Եռատոնի առիթով այսօր Հաղթանակի զբոսայգի այցելած առաջին նախագահ Լևոն Տեր-Պետրոսյանը չպատասխանեց «Ա1+»-ի այն հարցին, թե ԼՂՀ-ի անկախության ճանաչումը մասնավորապես ի՞նչ աղետալի հետևանքների կարող է հանգեցնել, ինչպես երկու օր առաջ կայքերից մեկում հրապարակած իր հոդվածի մեջ ասել էր հենց ինքը՝ Լևոն Տեր- Պետրոսյանը:
Վերջինս չպատասխանեց նաև մեր այն հաջորդ հարցին, թե ինչպես է վերաբերվում ԱԺ պատգամավոր Զարուհի Փոստանջյանի ներկայացրած օրինագծին՝ Արցախի ճանաչման վերաբերյալ: Փոխարենը նրա անվտանգության աշխատակիցներն էին ասում.
«Էսօր չէ, էսօր չէ , չի կարելի , հեռու.....»:
Իսկ ԱԺ պատգամավոր Գագիկ Ջհանգիրյանը մեզ հետ զրույցում անդրադառնալով Զարուհի Փոստանջյանի վերոնշյալ օրինագծին նշեց. «Ես այդպիսի օրինագծի մասին գաղափար չունեմ: Կառավարության անդամ չեմ, կառավարությունում չեմ եղել»:
Մեր այն դիտարկմանը, թե այդ օրինագիծն արդեն մտել է նաև ԱԺ և առաջիկա լիագումար նիստում դա է քննարկվելու, պարոն Ջհանգիրյանը պատասխանեց, որ դեռ չեն բերել, երբ որ կբերեն, կտեսնի և կասի:
Իսկ Արցախի անկախության ճանաչումը մեզ այսօր անհրաժե՞շտ է,-հարցրեցինք Գագիկ Ջհանգիրյանին: Վերջինս պատասխանեց այսպես. «Դա որպես նպատակ, անպայման, պետք է, բայց որպես միջոց՝ դրան հասնելու, պահը պետք է ճիշտ ընտրել: Եթե մենք այսօր, այս պահին ճանաչում ենք Արցախի անկախությունը, դա նշանակում է մենք ինքներս մեզ՝ ՀՀ-ն, Մինսկի խմբի բանակցային խմբից դուրս ենք դնում, դե գնացեք մնացածը դուք մտածեք»,-ասաց նա:
Այն հարցին, թե իսկ այսօր այդ խումբը գործում է, դուք տեսնում եք, ինչ գործնական քայլեր է այդ խումբը կիրառում, ի պատասխան Գագիկ Ջհանգիրյանը շեշտեց. «Ես տեսնում եմ, տեսողության հետ որոշ խնդիրներ ունեմ, բայց տեսնում եմ: Ես տեսնում եմ այդ գործունեությունը՝ մանավանդ ռազմական գործողությունների կասեցումը, այդ բոլորը Մինսկի խմբի համանախագահ երկրների գործունեության արդյունքն է՝ ուղղակի կամ անուղղակի»:
Պարոն Ջհանգիրյանից փորձեցինք նաև ճշտել, թե ինչպես է այդ դեպքում վերաբերում տարածքների փոխզիջման վերաբերյալ խոսակցություններին: Սակայն նրան դուր չեկավ այս հարցը:
«Չեղավ-չեղավ, դուք արդեն ձեր բոլոր լիմիտները սպառեցիք: Լավ եղեք, լավ եղեք , ձեր լիմիտները սպառվեցին»,-ասաց նա:
Կողմնակից եք դուք դրան, պարոն Ջհանգիրյան, օրինակ ինչպես օրեր առաջ ԱԺ-ում այդ մասին հայտարարել էր ԱԺ փոխնախագահ Հերմինե Նաղդալյանը, -հարցրեցինք նրան:
«Ուզում եք ինձ էլ դատի դա ձեր էդ բազմաթիվ գործիչները.... լավ, շնորհակալ եմ հարցերի համար, ապրեք»,-եզրափակեց նա:
Մանրամասները՝ տեսանյութում
