Քուրդ երիտասարդները նշում են Տյարնընդառաջը
Ազգությամբ քուրդ Քուբրա Սայիրն իր ընկերների հետ միացել է Սուրբ Աննա եկեղեցու բակում նշվող Տյարնընդառաջի տոնակատարությանը։ Հայաստանում հանգիստն անցկացնող քուրդ երիտասարդներն իրենց օտար չէին զգում. երկու ազգերի տոները բազմաթիվ նմանություններ ունեն։
«Հենց այսպիսի տոն է մեր Նովրուզը, որն ամեն տարի նշում ենք մարտի 21-ին։ Մենք նույնպես ձեզ նման կրակ ենք վառում և հետո թռնում դրա վրայով»,-«Ա1+»-ի հետ զրույցում նշեց Քուբրա Սայիրը։
Եկեղեցու բակում տոնակատարությունն ուղեկցվեց ազգագրական երգ ու պարով, որից անմասն չմնացին նաև Քուբրան և իր ընկերները։ Սկզբում նրանք սովորում էին պարել ազգագրական պարեր, իսկ հետո փոքրիկ խումբ կազմեցին ու սկսեցին երգել և պարել սեփական ազգային ստեղծագործությունները։
Արդեն չորրորդ օրը Հայաստանում անցկացնող ուսանողներին երկրի տեսարժան վայրերին ու տոներին ծանոթանալուն չի խանգարում անգամ ցուրտ եղանակը։
«Մենք այսօր եղանք Գառնիում և տեսանք Հայաստանի միակ հեթանոսական տաճարը։ Այն շատ գեղեցիկ էր։ Ես շատ եմ սիրում հին ճարտարապետական կոթողները, բայց այս չորս օրվա ընթացքում սիրեցի հատկապես հայկական ձմեռը»,- ասաց Քուբրան։
Քուրդ երիտասարդները Հայաստանում կմնան ևս մի քանի օր, բայց Քուբրայի խոսքով` հնարավորության դեպքում նորից կվերադառնան Երևան։
