Չեմ սիրում, որ հանդիսատեսը ծափահարում է նախկին կյանքիդ համար. Արաքս Մանսուրյան (տեսանյութ)
«Երբ ասում եմ 50 տարի բեմում եմ, մի պահ ինքս զարմանում եմ, հետո հիշում, որ 21 տարեկան էի, Ռոմանոս Մելիքյանի անվան երաժշտական ուսումնարանի ուսանող,երբ առաջին անգամ ելույթ ունեցա»,- այսօր Ալեքսանդր Սպենդիարյանի անվան օպերային թատրոնում կկայանա Արաքս Մանսուրյանի «50 տարի բեմում» խորագրով համերգային մեծարման երեկոն։ Համերգին կմասնակցեն Ավստրալիայից ժամանած նրա սաները: Կհնչեն Կոմիտաս, Տիգրան Մանսուրյան և արևմտաեվրոպական կոմպոզիտորների ստեղծագործություններ: Համերգի ավարտին Արաքս Մանսուրյանն իր սաների հետ կկատարի Կոմիտասի երգերից մեկը: «Տարիքի հետ ավելի իմաստնանում ես, կատարելագործվում ես, սակայն ձայնդ արդեն, ավաղ, տատանումներ կարող է տալ, և միգուցե ափսոսում ես, որ կատարողի մասնագիտությունը չես ընտրել»,-ասում է երգչուհին: -Պետք է կարողանաս ուժ գտնել ժամանակին բեմը թողնել: Չեմ սիրում, որ հանդիսատեսը ծափահարում է նախկին կյանքիդ համար»: Աշխատանքի մեջ Արաքս Մանսուրյանի համար ամեն ինչ կատարյալ պետք է լինի: Ազնիվ պետք է լինել բոլոր հարաբերություններում, չկեղծել: «Արվեստը կեղծիք չի սիրում», -ասում է նա: Հայաստանում ապրած տարիները իր ուղու կարևոր մասն է համարում: Ինչ վերցրել է այն տարիներին, այսօր մատուցում է Սիդնեյի կոնսերվատորիայի օտարազգի իր ուսանողներին: Հպարտանում է, որ նրանք հայերեն երգում են Կոմիտաս ու Մանսուրյան, երգերի միջոցով ծանոթանում մեր պատմությանը, մեր լեզվին, որն ի դեպ նրանց համար բարդ լեզու է, և որոշ հնչյուններ մեծ դժվարությամբ են կարողանում արտաբերել: Կան փայլուն երգիչներ, որոնք, սակայն, չեն կարողանում իրենց գիտելիքները փոխանցել: Արաքս Մանսուրյանը նրա սաների խոսքով, աշխարհի լավագույն մանկավարժներից է, ամենաէմոցիոնալը և իրենք երջանիկ են, որ նման ուսուցիչ ունեն, որի միջոցով հասկացան, թե ինչ է նշանակում Բել Կանտո երգեցողությունն ու «վարակվեցին» հայ երգի հանդեպ սիրով: Իդեպ, Արաքս Մանսոււրյանը նշեց, որ ուսանողներն անգամ նկատել են , թե որքան երջանիկ և ուրախ է ինքը Երևանում։ Երգչուհին երբ ասաց, որ պատրաստվում է բնակարան գնել մայրաքաղաքում, ուսանողներն արագ արձագանքեցին, ասելով, որ իրենք էլ կտեղափոխվեն Հայաստան։
