Շուկան փոխվեց (տեսանյութ)

Աջակցիր «Ա1+»-ին

       Գյումրիի Արագած փողոցի եւ Հաղթանակի պողոտայի հատման տեղում այսօր այլեւս     փողոցային առեւտուր չէր իրականացվում:

Այսօր առավոտյան իրավապահներն մանրածախ առեւտրականներին արգելել են վաճառք կազմակերպել եւ նրանց ուղեկցել են ծածկած շուկայի տարածք:

Մինչեւ հունիսի 2-ը Գյումրու Արագած փողոցի եւ Հաղթանակի պողոտայի հատման մասում անհատների կողմից մանրածախ առեւտուր էր իրականացվում: Իսկ այսօր առավոտյան մոտավորապես ժամը 7.30-ի հատվածում իրավապահներն արդեն արգելել են դրա իրականացումը: Կատարվածի վերաբերյալ անցորդների կարծիքները երկակի էին: Նրանք  մի  կողմից  դրական  էին  համարում  այն, որ  ի  վերջո  փողոցը  մաքուր  կպահվի, մյուս  կողմից  էլ  գտնում  են, որ  շատերի  համար  փակվեց  եկամտի  միակ  աղբյուրը:

  Սակայն մենք տեղեկացանք, որ առեւտրականներին  հնարավորություն է տրվել   աշխատել շուկայում: Իսկ  նրանք  գոհ  չեն   այստեղի  անցուդարձից: Նշում  են, որ  ժողովուրդը  սովոր  է  Հաղթանակի  պողոտայում  առեւտուր  անել : Մենք այցելեցինք այն շուկան, ուր տեղավորվել են դեռեւս երեկ Արագած փողոցում մանրածախ առեւտուր իրականացնողները: Նրանք դժգոհում էին առեւտրի ծավալներից: Տարբերություն  կա  նաեւ  տեղի  վարձավճարների  միջեւ: Նոր  հատկացված  վայրի  արժեքն  ավելի  բարձր  է:

  Շուկայի տնօրինությունն էլ պնդում է, թե մեկ տեղի համար վարձավճարը կազմում է ընդամենը 100 դրամ, իսկ նորեկներից առայժմ ոչինչ չի գանձվելու, մինչեւ առեւտուրը կարգավորվի: Ասենք, որ այս շուկայում տեղավորվել էին նաեւ նախկին դատարանի մերձակա հատվածում առեւտուր իրականացնողները: Նրանք հավաստում են, որ իրենց հաճախորդները նորից գտել են իրենց: Հիմա չեն դժգոհում առեւտրից:

  Իսկ նորեկներն ասում են, թե այստեղ իրենց խանգարում են մեծածախ առեւտուր իրականացնողները, ովքեր վաճառքը բնականաբար ավելի ցածր գնով են իրականացնում: Վերջիններս էլ ասում են, թե ցածր գնով վաճառքն իրականացնում է միայն առավոտյան ժամերին, երբ հենց մեծածախներից տեսականի են վերցնում նաեւ մանրածախները, իսկ օրվա երկրորդ կեսին, հատկապես երեկոյան ժամերին, գները չեն տարբերվում իրարից:

Գյումրիի «Ցայգ» ՀԸ