Բացել լրահոսը Փակել լրահոսը
A A

Հյուրանոցը' «ուրվական»

Մարզեր

  Արդեն քսան տարուց ավել է' որպես երկրաշարժի ուրվական Գյումրիի բնակիչներին շարունակում է ուղեկցել նախկին «Շիրակ» հյուրանոցի ավերված շենքը:

Տարիների ընթացքում այդ ուրվականը, պարբերաբար ենթարկվելով ինքնափլուզման, խլել է մարդկային կյանքեր: Կառավարության որոշմամբ այն ապամոնտաժվել է մինչեւ չորրորդ հարկը, որից հետո նախատեսվում էր այն տրամադրել Շիրակի մարզպետարանին: Սակայն 2004 թվականից հետո կառավարությունն այլեւս գումար չտրամադրեց նախկին հյուրանոցի վթարավտանգ շենքի ամրացման կամ ապամոնտաժման համար, իսկ ինքնափլուզման վտանգը շարունակում է մեծանալ:

  Նախկին Շիրակի հյուրանոցի շենքը մասնագետների կարծիքով' երկրաշարժից անմիջապես հետո հնարավոր էր վերականգնել: Տարիների ընթացքում մատնվելով անուշադրության՝ բնակիչների համար այն դարձավ ամրանների հարուստ հանք:

  Շենքի կայունության կորուստը նախ իրենց մաշկի վրա զգացին ՙամրանորսները՚: Առաջին զոհը գրանցվեց 2001 թվականի ապրիլի մեկին: Սակայն այս եւ հաջորդող դժբախտ դեպքերը չսթափեցրին ոչ քաղաքի բնակչությանը, ոչ էլ իշխանություններին: Հետագա դժբախտ պատահարներից խուսափելու համար կառավարությունն ի վերջո գումար հատկացրեց շենքի ապամոնտաժման համար: Թեեւ ծրագրի համաձայն այն ավարտվելու էր 90 օրում, սակայն ձգձգվեց երեք տարի:

  Ապամոնտաժումից  հետո  ծրագիր  կար  նախկին  հյուրանոցի  շենքում  տեղակայել  Շիրակի  մարզպետարանը: Սակայն այսօրվա դրությամբ մարզպետարանում շենքի վերաբերյալ ոչ մի ծրագիր չկա: Մարզպետարանը դեռեւս գումարներ չունի շենքի ամրացման համար:

  Շիրակի  մարզպետ  Լիդա  Նանյանը  նշում  է, որ  շենքն  ապամոնտաժելու  եւ  տարածքից  շինարարական  աղբը  հեռացնելու  համար  կպահանջվի  30 - 40  միլիոն  դրամ: Այժմ  այս  շենքի  հետ  կապված  ծրագիր  չկա, եւ  այն  կհանձնվի  ցանկացած  անհատի, ով  կկամենա  այստեղ  շինարարական  աշխատանքեր  իրականացնել:

  Մինչ կգտնվի ներդրողը, երբեմնի հյուրանոցի ամուր շենքը շարունակում է կորցնել իր կայունությունը՝ ենթարկվելով ժամանակի կործանիչ ազդեցությանը:

  Շենքը հիմնովին ապամոնտաժելու դեպքում հնարավոր կլինի կրող կոնստրուկցիան օգտագործել՝ նոր շենք կառուցելու համար: Իսկ այս պահին սեյսմաբանները դժվարանում են ասել, թե այս վիճակում շենքը որքան կդիմանա: Թեեւ հիմքն ամուր է, սակայն գրունտում կատարվող սեյսմիկ երեւույթներն անկանխատեսելի ազդեցություններ կարող են ունենալ շենքի ամրության վրա:

Գյումրիի «Ցայգ» ՀԸ