Եթե օրական 3 տուփ սիգարետ ծխող 30-ամյա պացիենտ ունենանք, ինքը պոտենցիալ չփրկվող է. Արսեն Թորոսյան (տեսանյութ)
Աջակցիր «Ա1+»-ինՀՀ վարչապետ Նիկոլ Փաշինյանի գլխավորած կառավարությունն այսօր՝ մարտի 30-ին, արտահերթ նիստ է հրավիրել, որտեղ քննարկվելու և ընդունվելու են հակաճգնաժամային եւս 3 փաթեթներ:
Արտահերթ նիստի մեկնարկին Առողջապահության նախարար Արսեն Թորոսյանը ներկայացրեց նոր կորոնավիրուսով պայմանավորված առկա իրավիճակը:
Նախարարը տեղեկացրեց, որ այս պահի դրությամբ կա 482 հաստատված դեպք, որից 58-ը՝ վերջին մեկ օրվա ընթացքում:
58-ից 25-ը եղել են ի սկզբանե կարանտինում, այսինքն՝ շփման շրջանակ չեն ունեցել,-նշեց նախարարը: Նրա փոխանցմամբ՝ 31-ը, որոնց մեջ կան նաև բուժաշխատողներ, ևս ի սկզբանե եղել են կասկածելի գոտում, միայն երկուսն են, որ արտերկրից բերովի դեպքեր են, և նրանց շփման շրջանակը պարզվում է:
Նախարարը հայտնեց, որ այս պահին ունենք 14 ծանր և մեկ ծայրահեղ ծանր դեպք, սակայն ծայրահեղ ծանրի մոտ դրական փոփոխություն է նկատվում, եւս երկու ծանր հիվանդների վիճակը բարելավվում է:
Վարչապետը հետաքրքվեց, թե 14 ծանր հիվանդների պարագայում կարո՞ղ ենք, որոշակի կանխատեսումներ անել, Թորոսյանն ասաց, որ մեր երկրում ամեն կոնկրետ դեպքն անհատական է, ունենք նաև երիտասարդ հիվանդ, ով ծանր է այս պահին, սակայն մեծ հավանականությամբ կդադարի ծանր լինել և կապաքինվի.
«Ամեն կոնկրետ պացիենտի քրոնիկական հիվանդություններն են հիմնականում որոշում ելքը, որովհետև առանց քրոնիկական հիվանդությունների՝ պացիենտները նույնիսկ չեն հասնում ռեանիմացիոն ծառայության»:
Նախարարը տեղեկացրեց, որ երիտասարդ քաղաքացին ուշ է դիմել բժշկական օգնության, այդ պատճառով է նրա վիճակը այս պահին գնահատվոմ ծանր:
Վարչապետն իր հերթին ցավակցություն հայտնեց մահացածների ընտանիքներին և հարազատներին:
Նշեց, որ վերջին օրերին մահացած երկու պացիենտներն էլ ունեցել են շատ ծանր քրոնիկական հիվանդություններ:
«Նրանցից մեկը ունեցել է սրտի իշեմիկ հիվանդություն և զարկերակային գերճնշում, երկրորդը ունեցել է էլի սրտի իշեմիկ հիվանդություն և զարկերակային հիպերտոնիա, սրտամկանի ինֆարկտից և ինսուլտից հետո առաջացած հետևանքներ: Հատկապես այս կարգի քաղաքացիների նկատմամբ առանձնահատուկ ուշադրություն է պետք, որպեսզի նրանք հանկարծ չվարակվեն, որվհետև շատ մեծ ռիսկի դաշտում են հայտնվում։ Կոչ եմ անում մեր բոլոր հայրենակիցներին առանձնակի ուշադիր լինել այս խմբի մեր հայրենակիցների նկատմամբ, պահպանել մեկուսացման ռեժիմը»:
Վարչապետը նաև հետաքրքրվեց՝ ինչպիսի՞ն է հիվանդության հետ կապված դրական դինամիկան։ Նախարարն ասաց, որ 250 քաղաքացի արդեն դուրս է եկել մեկուսացումից:
Հայտնեց, որ մոտ օրերին էլի ունենալու են բուժված քաղաքացիներ՝ բացի արդեն հայտնի 30 դեպքից:
Առանց սիմպտոմների պացիենտները պահվում են ոչ թե հիվադանոցում այլ, հյուրանոցներում, -հայտնեց վարչապետը՝ ընդգծելով, որ նրանք ոչ մի բժշկական միջամտության կարիք չունեն:
Վարչապետը հետաքրքրվեց նաև մահացության դեպքերի երիտասարդացման լուրերի մասին, Թորոսյանն ասաց, ոոր ուսումնասիրել են, վիճակագրությունը տարբեր է, հիմնականում կապված է երկրի բնակչության կենսակերպից.
«Օրինակ՝ եթե մենք օրական 3 տուփ սիգարետ ծխող 30 տարեկան մարդ ունենանք, ինքը պոտենցիալ չփրկվող պացիենտ է: Նույն մեր հարևաններից մեկի մասին կար նման տվյալներ, իհարկե չճշտված, երբ ասում էին, որ արհեստական օդափոխման սարաքերի վրա կան բավականին մեծ թվով 40-ից ցածր անձինք, պետք է պարզել այդ անձանց առողջական պատկերը»,-նշեց Թորոսյանը:
Պաշտպանության նախարար Դավիթ Տոնոյանն էլ հայտնեց, որ մեկուսացումից և ինքնամեկուսացումից տասնյակ զինծառայողներ վերադառնում են ծառայության՝ վերստուգումից հետո:
ԿԳՄՍ նախարար Արայիկ Հարությունյանն անդրադարձավ հեռավար կրթությանը, վստահեցրեց՝ հեռավար կրթության վերբերյալ հիմնականում դրական արձագանքներ են ստանում, ինչը ուսուցիչների մեծ մասնակցության արդյունք է:
«Իհարկե ունենք մի խնդիր, որը կապված է սարքերի և ինտերնետ կապի հասանելիության հետ, մենք փորձում ենք հընթացս այս հարցին լուծում տալ: Մի նախաձեռնություն ենք իրականացնում, որով հավաքում ենք համակարգիչներ, հիմնականում խոսել ենք միջազգային դոնոր կազմակերպությունների հետ: Մոտ 24 հազար աշակերտների պարագայում ունենք խնդիր՝ սարքերի հետ կապված»:
Նախարարը շեշտեց նաև, որ բուհերը ևս շատ արդյունավետ օգտագործում են հեռավար կրթությունը:
Վարչապետն էլ ասաց, որ այս փորձը կօգնի մեզ հետագայում նաև հեռավոր գյուղերում հեռավար կրթությունը զարգացնելու նպատակին հասնելու գործում:
