Հայաստանն արդեն բանակցում է կորոնավիրուսի դեմ պատվաստանյութ ձեռք բերելու համար. Արսեն Թորոսյան (տեսանյութ)

Առողջապահության նախարար Արսեն Թորոսյանը  լավատեսական հայտարարություն արեց՝ նույնիսկ երբ  կորոնավիրուսային իրավիճակը մնում է մտահոգիչ։

Ըստ նրա՝  աշխարհում արդեն  իսկ 100-ից ավելի թեկնածու պատվաստանյութեր կան, որոնցից 20-ը հավանաբար կդառնան պատվաստանյութեր։

«Ամենայն հավանականությամբ՝ լինելու են պատվատանյութեր, եւ լինլու է ոչ  թե մեկը, այլ մի քանի , որը շատ կարևոր է երկրագնդի ազգաբնակչության համար, որովհետեւ այսպիսի վիրուսի դեմ երբեւիցե պատվաստանյութ չէր ստեղծվել»,-ասաց նա՝  նկատի ունենալով փորձարկումների արդյունքները։

Հայաստանն արդեն բանակցություններ է վարում մի քանի ուղղություններով, մեկն՝ ուղիղ արտադրողների հետ, այդ դեպքում՝ անձամբ նախարարը։

« Երեկ խոսել եմ «Մոդեռնա» ընկերության կոմերցիոն տնօրենի հետ, որը մեր հայրենակից Նուբար Աֆեյանի հետ փոխկապակցված ընկերություն է: Եւ այդ վակցիանան հավանական թեկնածուներից մեկն է։Նաեւ բանակցում ենք ԱՀԿ-ի, GAVI-ի, UNICEF-ի  պլատֆորմների հետ, որոնք փորձելու են հավաքական գնումներ իրականացնել»,- ասաց Արսեն Թորոսյանը։

Նա կարեւորում է այս պահից սկսած արդյունավետ բանակցությունները, քանի որ կարող են լինել երկրներ, որոնք միանգամից մեծ քանակի պատվաստանյութ կգնեն եւ մյուս երկրներին  այն կհասնի  շատ ավելի ուշ:

Նրա խոսքով՝ պատվաստանյութերը պատրաստ կլինեն  2020թ-ի վերջին կամ 2021 թվականի սկզբին։ Դա վերջնական պարզ կլինի աշնան սկզբին, որովհետեւ երրորդ փուլի հետազոտությունների ամփոփումը լինելու է  այդ ժամանակ:

« Պատվաստանյութերը լինելու են և փոխվելու է ամբողջ իրավիճակը։ Մենք վերադառնալու ենք մեր սովորական կյանքին՝ առանց դիմակների եւ մնացած կանոների,  արդեն ուրախալի է: Պետք է հետեւենք,  հետ չմնանք զարգացումներից»,-ասաց նախարարը: