Լճաշեն համայնքի արոտներն ու հողերը 48 մլն եվրոյով կառավարությունը օտարեց մասնավորին (տեսանյութ)
Աջակցիր «Ա1+»-ինԱյսօր կառավարությունը քննարկեց եւ հավանություն տվեց բավական խոշոր ներդրումային ծրագիր՝ շուրջ 48մլն․ եվրո ընդհանուր արժողությամբ։ Գեղարքունիքի մարզի Սևան համայնքում «Արդյունաբերական ջերմոցային համալիր»-ի կառուցման ներդրումային ծրագիրը ներկայացրել էր գործարար Էդուարդ Օհանյանը։
Տարածքային կառավարման և ենթակառուցվածքների նախարար Գնել Սանոսյանը հայտնեց, որ ներդրումային ծրագրի իրականացման համար կառավարությունը պետք է տա իր համաձայնությունը, որպեսզի հողամասն ուղիղ վաճառքով օտարվի։
«Ընդհանուր առմամբ՝ այս գործարքի արդյունքում համայնքային բյուջե մուտք կգործի 28 մլն դրամ։ Ծրագիրը իրականացվելու է 115 հեկտար տարածքի վրա և ընդգրկելու է Լճաշեն և Վարսեր բնակավայրերի հողերը։
Նախատեսվում է կառուցել 45 հեկտար տարածքով ջերմոցային խոշոր համալիր և 2,7 հեկտար մակերեսով արդյունաբերական տնկարան։ Շինարարության աշխատանքների համար նախատեսված է 60 ամիս ժամկետ և այդ ընթացքում 350-400 ժամանակավոր, իսկ դրանից հետո 400-450 մշտական աշխատատեղեր կլինի։ Աշխատատեղերի մոտ 75 տոկոսը նախատեսված կլինի կանանց համար։
Վերջնական արդյունքում տարեկան մոտ 12000 տոննա բանջարեղեն կարտադրվի, որի 80 տոկոսը նախատեսված է արտահանման»,-կառավարության նիստում տեղեկացրեց Գնել Սանոսյանը։ Պայման է, որ ձեռք բերված հողերը ծառայեն միայն ծրագրի համար։
Վարչապետ Նիկոլ Փաշինյանը կողմ էր այս ծրագրին․ իր հերթին էլ հավելեց՝ պետք է հոգ տանել, որպեսզի նմանատիպ ծրագրերի իրականացման համար արհեստական խոչընդոտներ չստեղծվեն։
Ի դեպ, Էդուարդ Օհանյանի ստանձնած պարտավորությունների համար Հայաստանի Հանրապետության կառավարության առջև համապարտ պատասխանատվություն է կրում գործարարի հիմնադրած «ԳՐԻՆ ՍՈԼՈՒՇՆՍ» ՍՊ ընկերությունը։
