ՓՄՁ-ները շարունակում են բողոքի ակցիաները․ պահանջում են հարկային նոր փոփոխությունների կասեցում

Փոքր և միջին ձեռնարկատիրությամբ (ՓՄՁ) զբաղվող տնտեսվարողները շարունակում են բողոքել 2025 թվականի հունվարի 1-ից ուժի մեջ մտած հարկային փոփոխությունների դեմ։ Խոսքը ՀՕ-340-Ն և ՀՕ-285-Ն օրենքների մասին է, որոնք խստացնում են շրջանառության հարկի ռեժիմում գործող տնտեսվարողների վարչարարությունը, ինչպես նաև կրկնակի անգամ բարձրացնում են հարկային դրույքաչափերը։

Այս փոփոխությունները դժգոհություն են առաջացրել ՓՄՁ համայնքում, քանի որ շրջանառության հարկի դրույքաչափի բարձրացումը և հաշվառման նոր պահանջները էականորեն ծանրաբեռնում են բիզնեսի գործունեությունը։ Չնայած այն հանգամանքին, որ որոշ տնտեսվարողներ հնարավորություն ունեն նվազեցնելու հարկային բեռը հիմնավորված ծախսերի հաշվառման միջոցով, ոլորտի մեծամասնությունը պնդում է, որ նոր կարգավորումները լրացուցիչ բյուրոկրատական բեռ են ստեղծում և խոչընդոտում բիզնեսի բնականոն գործունեությունը։

ՓՄՁ-ների պահանջները

ՓՄՁ Ասոցիացիայի ներկայացուցիչները մինչ այժմ մասնակցել են ՀՀ Ազգային ժողովի և պետական մարմինների հետ տարբեր ձևաչափերով քննարկումներին։ Ասոցիացիայի կողմից արդեն գրավոր պահանջ է ներկայացվել պատկան մարմիններին, որով ընդգծվում է՝

• Կասեցնել 2025 թվականի հունվարի 1-ից ուժի մեջ մտած հարկային նոր կարգավորումները,
• Կասեցման ընթացքում մշակել առավել ադապտացված և ՓՄՁ-ների համար իրագործելի լուծումներ՝ համագործակցային քննարկումների միջոցով։

ՓՄՁ-ները պատրաստվում են նոր բողոքի ակցիայի

ՓՄՁ բողոքի ակցիաների ակտիվ խումբը, վերջին հավաքից հետո, որոշել է փետրվարի 13-ին, ժամը 11:00-ին հավաքվել ՀՀ կառավարության շենքի առջև, որպեսզի ստանա հստակ դիրքորոշում վերոհիշյալ հարկային օրենքների ժամկետների հետաձգման վերաբերյալ։

Բողոքող տնտեսվարողները նշում են, որ իրենց պայքարը շարունակական է լինելու, քանի դեռ կառավարությունը չի արձագանքել իրենց պահանջներին։