Արջերն ու մեղվափեթակները. Վայոց ձորում փնտրում են բնության հետ հաշտ ապրելու բանալին

Արդեն 235 մասնակից, այդ թվում 65 կին, ստացել են մեղվաբուծության առաջադեմ հմտություններ՝ համատեղելով կենսամակարդակի բարելավումը և բնության պահպանությունը

Վայրի բնության և մշակութային արժեքների պահպանման հիմնադրամը (FPWC) հաջողությամբ մեկնարկել է կայուն մեղվաբուծության դասընթացներ Վայոց ձորի Եղեգիս համայնքում: Դասընթացների շնորհիվ համայնքի անդամները ձեռք են բերում գործնական հմտություններ մեղրի արտադրության, հիվանդությունների կանխարգելման և արդյունավետ շուկայահանման ուղղություններով: Ծրագրի արդյունքում արդեն իսկ 235 մասնակից, որոնցից 65-ը կանայք են, տիրապետում են գիտելիքների, որոնք նպաստում են ինչպես տեղական կենսամակարդակի բարելավմանը, այնպես էլ Հայաստանի հարուստ կենսաբազմազանության պահպանմանը:

«Մեր դասընթացներն օգնում են տեղի բնակիչներին ոչ միայն բարելավել իրենց մեղվաբուծության հմտությունները, այլև սովորել, թե ինչպես կարող են ներդաշնակ հարաբերություններ կառուցել շրջակա վայրի բնության հետ», - նշում է Եղեգիս համայնքապետարանի աշխատակից Գեղամ Մարգարյանը:

Խոսքը Վայոց ձորի բնակավայրերին մոտեցող գորշ արջերի մասին է, ինչի համար կենդանին ունի մի շարք դրդապատճառներ, հիմնականում՝ կերի և տարածքների կրճատում, կլիմայի փոփոխություններ և այլն։ Վերջին 5-6 տարիների ընթացքում մարդ-վայրի կենդանի կոնֆլիկտը հատկապես սրվել է Վայոց ձորում․ արջերն իջնում են գյուղեր՝ երբեմն վնասելով գյուղատնտեսական ցանքատարածությունները, պտղատու այգիներն ու մեղվափեթակները, ինչպես նաև մանր ու խոշոր գյուղատնտեսական կենդանիներին:

Եղեգիս համայնքի ակտիվ մասնակցությունը ծրագրի հաջողության կարևոր գրավականներից է։ Համայնքապետարանը ցուցաբերում է լիարժեք աջակցություն և ամեն կերպ նպաստում է նախաձեռնության արդյունավետ իրականացմանը։ Եղեգիս համայնքի ղեկավարի Ժ/Պ Ահարոն Գաբրիելյանը ևս ակտիվորեն ներգրավված է ծրագրի աշխատանքներում՝ ապահովելով բնակիչների ակտիվ մասնակցությունը և

ռեսուրսների հասանելիությունը։ Համայնքի ղեկավարությունը սերտորեն համագործակցում է FPWC-ի մասնագետների հետ՝ մշակելով երկարաժամկետ լուծումներ, որոնք կնպաստեն ինչպես գյուղատնտեսության զարգացմանը, այնպես էլ մարդ-վայրի կենդանի կոնֆլիկտի մեղմմանը։

Դասընթացների շրջանակում մասնակիցները սովորում են՝

· Մեղվափեթակների արդյունավետ կառավարում

· Մեղվաընտանիքների հիվանդությունների կանխարգելում և բուժում

· Բարձրորակ մեղրի արտադրություն և մշակում

· Արտադրանքի շուկայահանման ժամանակակից մեթոդներ

· Կլիմայի փոփոխության պայմաններում մեղվաբուծության կայուն մեթոդներ

Զուգահեռաբար FPWC-ն աշխատում է մշակել կլիմայի փոփոխության պայմաններում մարդ-վայրի բնություն հակամարտության մեղմման մեխանիզմներ, հատկապես կապված տեղական գորշ արջերի հետ, որոնք երբեմն վնասում են մեղվափեթակները:

«Մենք ուսուցանում ենք էկոլոգիապես կայուն մեղվաբուծության մեթոդներ, որոնք օգնում են պաշտպանել փեթակները վայրի կենդանիներից, միաժամանակ չվնասելով դրանց: Մեր մոտեցումը թույլ է տալիս մարդկանց և վայրի բնությանը գոյակցել ներդաշնակորեն», - հավելել է ծրագրի ղեկավար Սոնա Քալանթարյանը:

Այս նախաձեռնությունը FPWC-ի «Մեղմելով կլիմայի փոփոխությամբ պայմանավորված մարդ-վայրի կենդանի ահագնացող կոնֆլիկտը Հայաստանում» ծրագրի մաս է կազմում, որը ֆինանսավորվում է Միացյալ Թագավորության կառավարության կողմից՝ «Դարվին» նախաձեռնության շրջանակում: Ծրագիրն առաջիկա երեք տարիների ընթացքում կաջակցի Վայոց ձորի համայնքներին՝ բարձրացնելու նրանց դիմադրողականությունը կլիմայի փոփոխության ազդակների նկատմամբ և պահպանելու տեղական կենսաբազմազանությունը:

Լրացուցիչ տեղեկությունների համար դիմել՝

098509939