Տոնելու են պրոֆեսորի 75-ամյակը
Երևանի Մ. Հերացու անվան պետական բժշկական համալսարանի կենտրոնական դահլիճում կնշվի ՀՀ ԳԱԱ Բնական գիտությունների բաժանմունքի ակադեմիկոս-քարտուղար, բժշկական գիտությունների դոկտոր, պրոֆեսոր Վիլեն Պարույրի Հակոբյանի ծննդյան 75-ամյակը:
Վիլեն Հակոբյանը ճանաչված բժիշկ-դեղաբան է, մանկավարժ և հասարակական գործիչ, Երևանի պետական բժշկական համալսարանի երկարամյա նախկին ռեկտոր:
Վիլեն Հակոբյանի հետազոտությունները վերաբերում են ուղեղային արյան շրջանառության ֆարմակոլոգիային, ուղեղային արյան շրջանառության վրա ֆիզիոլոգիապես ակտիվ նյութերի ազդեցության մեխանիզմների բացահայտմանը:
Նա բժշկական գիտությունների միջազգային, Լեհաստանի բժշկական, ՌԴ բժշկատեխնիկական գիտությունների, Ինֆորմատիզացիայի ակադեմիաների և Ֆրանսիայի դեղաբանների միջազգային միության (IUPHAR) (France) անդամ է: Պարգևատրվել է Ալբերտ Շվեյցերի ոսկե, Սուրբ Մեսրոպ Մաշտոց, Մխիթար Հերացու անվան, Վերնադսկու ոսկե և Ֆ.Նանսենի ոսկե մեդալներով, արժանացել է ՀՀ նախագահի մրցանակի և Ամենայն Հայոց Կաթողիկոսի «Սուրբ Սահակ-Սուրբ Մեսրոպ» շքանշանի:
