Ավստրիացի ինժեները, հին Երեւանն ու չժամանող զբոսաշրջիկները (տեսանյութ)
Որքան էլ տարօրինակ հնչի, ավստրիացի Գունտեր Ռեյֆի համար Երեւանն այսօր ավելի կանաչ է, քան 37 տարի առաջ։ Մոտ երկու տարի նա ապրել է խորհրդային Հայաստանում՝ աշխատելով որպես ինժեներ Մասիսի ֆաբրիկաներից մեկում։
Ազատ ժամերին հազարավոր լուսանկարներ է արել, որոնցից 400-ը նա նվիրել է Hin Yerevan կայքին։ Նախորդ տարվա վերջին ստեղծված ոչ կոմերցիոն կայքի մասին պատահաբար է իմացել՝ ֆեյսբուքյան գովազդի միջոցով։ Գաղափարն իրեն ոգեւորել է եւ սկսել է կայքում բեռնել լուսանկարները։
Քաղաք,որը փորձում է արեւմտյան տեսք ձեռք բերել, բայց դեռ ապրում է արեւելյան շնչով։ Ահա այսպես է բնութագրում Երեւանը ավստրիացի ինժեները։
Հայաստանում բնակվողի տեսակետը մի քիչ այլ է։ hinyerevan.com կայքի երեւանյան պատասխանատու Գալուստ Նանյանն ասում է, որ վարդագույն Երեւանից գրեթե ոչինչ չի մնացել։
Նման համոզումը ծնվել է կայքի՝ տարբեր օգտատերերի կողմից բեռնված լուսանկարները համադրելիս։ Արդեն 1778 լուսանկար կա կայքում՝ ներկայացնելով Երեւանը 1826թ-ից սկսած։ «Փոփոխությունները շատ են եւ դեպի վատը»,- շարունակում է Գալուստ Նանյանը։
Գրեթե ամեն տարի Հայաստան եկող Գունտեր Ռեյֆն էլ է որոշել համեմատություններ անել։ Այցելելու է այն վայրերը,որտեղ նախկինում լուսանկարներ է արել,որպեսզի նորերի միջոցով համադրի անցյալն ու ներկան։
Ավստրիացի ինժեներին դեպի Հայաստան կանչում են ոչ միայն իր կնոջ արմատները, որի հետ ծանոթացել է Մասիսում աշխատելիս, այլեւ կլիման։ Ասում է, որ Հայաստանում ավելի քիչ է դեղորայք ընդունում, ինչը ստիպված է անել Ավստրիայում առողջական խնդիրների պատճառով։
Նրան այստեղ դուր է գալիս նաեւ կյանքի տեմպը,որն Արեւմուտքի համեմատ ավելի դանդաղ է։
Մտածել գլոբալ՝ պահպանելով ավանդությունները. այս կերպ, ըստ նրա, Հայաստանը ավելի կհրապուրի զբոսաշրջիկներին։ Նրա կարծիքով՝ Հայաստան եկող զբոսաշրջիկների թվի վրա ազդում է նաեւ արտագաղթը։ Երկիրը լքողների մեծ մասի պատմությունները՝ հայրենիքի սոցիալ-տնտեսական դժվարությունների եւ ոչ ժողովրդավար լինելու մասին, նվազ հրապուրիչ են դարձնում Հայաստանը։
