Ցմահ դատապարտյալ. «Գեներալը ամաչո՞ւմ է հանդիպման գալ» (տեսանյութ)
Ցմահ դատապարտյալ Արմեն Տեր -Սահակյանն արդեն 15 оր է` գտնվում է հացադուլի մեջ է եւ հանդիպում է պահանջում Սերժ Սարգսյանի վերահսկողական ծառայության պետ Ֆելիքս Ցոլակյանի հետ: «Մի բան ասեմ՝ գեներալը ամաչում է գա ինձ հետ հանդիպման, եթե ուզում է սովամահ լինեմ, կլինեմ»,- այսօր դատարանում հայտարարեց Արմեն Տեր-Սահակյանը: Իսկ այսօր Վերաքննիչ դատարանում Արմեն Տեր-Սահակյանը բողոքարկում է վաղաժամկետ ազատ արձակման դիմումը մեկ տարով հետաձգելը: «Հետաձգումից անցել է 6-7 ամիս, բայց ոչ մի աշխատանք չեն տարել: Այսինքն՝ 5 ամիս հետո գալու են նորից հետաձգե՞ն: 20 տարի ի՞նչ էին անում: Պատճառը ո՞րն է հետաձգելու»: Հացադուլի մեջ գտնվելն էլ պատճառ դարձավ, որ նա դատարանին դիմելիս ոտքի չկանգնի: Արմեն Տեր-Սահակյանը դատապարտվել է ցմահ ազատազրկման՝ ՆԳ նախկին նախարար Վանո Սիրադեղյանի եւ մյուսների գործի շրջանակներում: Ցմահ ազատազրկման դատապարտվածին զարմացնում է՝ եթե վաղաժամկետ ազատ արձակման ինստիտուտը Հայաստանում չի գործում, ապա ո՞ւմ համար է օրենքը: Դատավոր Մխիթար Պապոյանը, որ չցանկացավ տեսանկարահանվել, խորհրդակցական սենյակից վերադառնալուց հետո մերժեց բողոքը: «Որոշումը արդարացի չէր: Ընդհանուր իրավասության դատարանը Արմեն Տեր- Սահակյանի բողոքը մերժելու հիմքում դրել էր Արդարադատության նախարարի 2008 թ. հրամանով սահմանված չափորոշիչներ, իսկ հրամանը ուժը կորցրած է եղել»,- նշեց պաշտպան Էմիլ Բեգլարյանը: Դատարանի որոշումը կբողոքարկվի Վճռաբեկ դատարանում:
