Հայանիստի գործով հետախուզման մեջ գտնվողը դեռ չի հայտնաբերվել (տեսանյութ)
Ապրիլի 22-ին Հայանիստ գյուղում տեղի ունեցած խուլիգանության միջադեպի գործով հետախուզման մեջ գտնվող Ս․ Կարապետյանը դեռ չի հայտնաբերվել։ ՀՀ քննչական կոմիտեի նախագահի խորհրդական Սոնա Տռուզյանն «Ա1+»-ին տեղեկացրեց, որ քրեական գործով շարունակվում են կատարվել մեծածավալ քննչական գործողություններ՝ դեպքի բազմակողմանի քննությունն ապահովելու նպատակով։ Դրանից հետո, ձեռք բերված ապացույցների հիման վրա կտրվի համարժեք գնահատական։ Հիշեցնենք, որ 2018 թվականի ապրիլի 22-ին Մասիս բժշկական կենտրոնից ահազանգ էր ստացվել, որ «աջ սրունքի փափուկ հյուսվածքներ թափանցող հրազենային վերք» ախտորոշմամբ, իրենց մոտ է տեղափոխվել Էջմիածին քաղաքի 60-ամյա բնակիչ։ Հրազենային վնասվածքը նա ստացել է Արարատի մարզի Հայանիստ-Հովտաշատ գյուղերի խաչմերուկի մոտ տեղի ունեցած վիճաբանության ժամանակ, որը ծագել էր, երբ քաղաքացիներին թույլ չեն տվել գնալ բողոքի ակցիայի։ Ըստ մամուլի հրապարակումների՝ ցուցարարների վրա հարձակվողներին ղեկավարել է Մասիսի քաղաքապետ Դավիթ Համբարձումյանի եղբայրը՝ Գոռ Համբարձումյանը։ Նրա հետ են եղել քաղաքապետի այլ մտերիմներ։ Միջադեպի գործով խուզարկություն է կատարվել նաեւ քաղաքապետի տանը։ Իսկ Գոռ Համբարձումյանը, ըստ տեղեկությունների, Հայաստանում չէ, գտնվում է Ֆրանսիայում։ Գոռ Համբարձումյանի անունը կապվում է նաեւ Հերացու փողոցում խաղաղ ցուցարարների վրա հարձակվելու հետ։ Ի դեպ, «Ա1+»-ի ձեռքի տակ կա տեսանյութ՝ նկարահանված Հայանիստի միջադեպի ժամանակ ։ Ներկաներից մեկը շատ նման էր Մասիսի քաղաքապետին։ Ըստ ականատեսների՝ իրոք, նա էր։ Այսինքն՝ չի բացառվում, որ նրա մտերիմները,որոնք կասկածվում են ցուցարարներին ծեծելու մեջ, այդ օրը առաջնորդվել են նաեւ նրա հրահանգով։
